தென்காசி மாவட்டம், சங்கரன்கோவிலில் ரயில்வே கேட்டு அருகே ஓடும் அரசு பேருந்தில் பயங்கர தீ விபத்து ஏற்பட்டது. இதில், 57 பயணிகள் அதிர்ஷ்டவசமாக உயிர் தப்பினர்.
ஸ்ரீவில்லிபுத்தூரில் இருந்து திருநெல்வேலிக்கு அரசு பேருந்து ஒன்று 57 பயணிகளுடன் இயக்கப்பட்டு வந்தது. இந்த பேருந்து, சங்கரன்கோவில் என்.ஜி.ஓ காலனியில் உள்ள ரயில்வே கேட்டு அருகே வந்தபோது, ரயில் வருவதற்காக கேட் மூடப்பட்டிருந்தது. இதனால், பேருந்து உட்பட ஏராளமான வாகனங்கள் ரயில்வே கேட் முன்பு காத்திருந்தன.
ரயில் கடந்து சென்ற பிறகு, ரயில்வே கேட் திறக்கப்பட்டது. பேருந்தை இயக்குவதற்காக ஓட்டுநர் ஸ்டார்ட் செய்தபோது, பேருந்து ஸ்டார்ட் ஆகவில்லை. மாறாக, பேட்டரி பகுதியில் இருந்து கரும்புகை வெளியேறத் தொடங்கியது. சிறிது நேரத்தில் பேருந்தில் தீப்பிடித்து எரிய ஆரம்பித்தது.
உடனடியாக பேருந்தை ஓரங்கட்டிய ஓட்டுநர், பேருந்து முழுவதுமாக தீப்பிடிப்பதற்குள் பயணிகளை வெளியேறுமாறு எச்சரித்தார். இருப்பினும், பேருந்தின் கதவுகள் உடனடியாக திறக்கவில்லை என்று கூறப்படுகிறது. இதனால், பயணிகள் அவசரகால கதவுகள் மற்றும் ஜன்னல்கள் வழியாக வெளியேறி தங்களைக் காப்பாற்றிக் கொண்டனர்.
சம்பவ இடத்திற்கு விரைந்து வந்த தீயணைப்பு மற்றும் மீட்பு படையினர், பேருந்தில் பற்றி எரிந்த தீயை துரிதமாக செயல்பட்டு அணைத்தனர். அதிர்ஷ்டவசமாக, பயணிகள் அனைவரும் பேருந்தின் கதவுகள் திறக்க தாமதமானாலும், தீ விபத்து ஏற்பட்டதும் உடனடியாக பேருந்தை விட்டு வெளியேறியதால் காயங்கள் ஏதுமின்றி உயிர் தப்பினர்.
தீ விபத்து குறித்து காவல்துறைக்கு தகவல் தெரிவிக்கப்பட்டது. சம்பவ இடத்திற்கு வந்த காவல்துறையினர் விசாரணை நடத்தினர். பயணிகள் பத்திரமாக மீட்கப்பட்டு, மாற்று பேருந்து ஏற்பாடு செய்யப்பட்டு அவர்கள் திருநெல்வேலிக்கு அனுப்பி வைக்கப்பட்டனர். இந்த தீ விபத்து காரணமாக அப்பகுதியில் சிறிது நேரம் போக்குவரத்து பாதிக்கப்பட்டது.
ஓடும் பேருந்தில் ஏற்பட்ட இந்த தீ விபத்து பெரும் பரபரப்பை ஏற்படுத்தியது. பயணிகளின் உயிரைக் காப்பாற்றும் நோக்கில் ஓட்டுநரின் சமயோசித செயலால் பெரும் விபத்து தவிர்க்கப்பட்டது. தீயணைப்புத் துறையினரின் விரைவான செயல்பாடும் பெரும் சேதத்தைத் தடுத்தது.
