தமிழ்நாடு மின்சார வாரியத்தை தனியாருக்கு தாரைவார்க்கும் ஆளும் த.வெ.க அரசின் கார்ப்பரேட் ஆதரவு நிலைப்பாட்டிற்கு மின்ஊழியர் மத்திய அமைப்பு கடும் கண்டனம் தெரிவித்துள்ளது.
தூத்துக்குடியில் தற்போதுள்ள 5×210 மெகாவாட் மின்நிலையத்தை அகற்றிவிட்டு, அதற்கு பதிலாக 2×800 மெகாவாட் மின் திறன் கொண்ட சூப்பர் கிரிட்டிக்கல் அனல் மின் நிலையத்தை சுமார் ரூ.20,800 கோடி முதலீட்டில் பொது மற்றும் தனியார் பங்களிப்புடன் தொடங்கப்படும் என சட்டப்பேரவையில் முதலமைச்சர் விஜய் அறிவித்துள்ளார். இந்த அறிவிப்பு மின்சார வாரியம் தனியார்மயம் ஆவதை நோக்கி வேகமாகச் செல்கிறது என்பதை உணர்த்துவதாக தமிழ்நாடு மின்ஊழியர் மத்திய அமைப்பின் பொதுச் செயலாளர் தி.ஜெயசங்கர் தெரிவித்துள்ளார்.
மேலும், எண்ணூர் அனல்மின் நிலையங்களை பொது-தனியார் கூட்டாண்மை (PPP) முறையில் தனியாரிடம் ஒப்படைக்கும் முதலமைச்சரின் அறிவிப்பிற்கும், ஸ்மார்ட் மீட்டர் திட்டத்தை தனியாரிடம் வழங்கும் த.வெ.க அரசின் முடிவிற்கும் மின் ஊழியர் மத்திய அமைப்பு கடும் எதிர்ப்பு தெரிவித்துள்ளது.
மின்வாரியத்தில் 10,000 பணியாளர்களை 5 ஆண்டு ஒப்பந்த அடிப்படையில் மட்டுமே நியமிக்கும் த.வெ.க அரசின் முடிவை தமிழ்நாடு மின்ஊழியர் மத்திய அமைப்பின் பொதுச் செயலாளர் தி.ஜெயசங்கர் கேள்விக்குள்ளாக்கியுள்ளார்.
புதிய புனல் மின் நிலையங்கள் மற்றும் துணை மின் நிலையங்களையும் தனியாருக்கு விற்கும் த.வெ.க அரசின் நிர்வாக திறமையின்மை அம்பலமாகியுள்ளதாக எதிர்க்கட்சிகள் விமர்சித்துள்ளன.
இந்த நடவடிக்கைகள் மின்சார துறையில் தனியார்மயமாக்கலை ஊக்குவிப்பதாகவும், இது பொதுமக்களுக்கு நீண்டகாலத்தில் பாதிப்பை ஏற்படுத்தும் என்றும் பலரும் கருத்து தெரிவித்து வருகின்றனர்.
மின்வாரியத்தின் முக்கிய திட்டங்கள் மற்றும் செயல்பாடுகள் தனியார் நிறுவனங்களிடம் ஒப்படைக்கப்படுவது, அரசு நிர்வாகத்தின் பொறுப்புடைமையைக் குறைப்பதாகவும், வெளிப்படைத்தன்மை கேள்விக்குள்ளாக்கப்படுவதாகவும் குற்றச்சாட்டுகள் எழுந்துள்ளன.
எனவே, மின்சார வாரியத்தை தனியார்மயமாக்கும் த.வெ.க அரசின் நடவடிக்கைகளை மறுபரிசீலனை செய்ய வேண்டும் என பல்வேறு தரப்பினரும் கோரிக்கை விடுத்துள்ளனர்.
