ராமநாதபுரம் மாவட்டம் உச்சிப்புளி அருகே மூப்பன்வலசை கிராமத்தில் வசிக்கும் சரிதா (22) என்ற இளம்பெண், தனது முன்னாள் காதலன் லோகேஷ், தனது அந்தரங்க புகைப்படங்களை சமூக வலைதளங்களில் வெளியிட்டதால் மன உளைச்சலுக்கு ஆளாகி தற்கொலை செய்து கொண்ட சம்பவம் பெரும் சோகத்தை ஏற்படுத்தியுள்ளது.
சரிதாவும், பிரம்பன்வலசை கிராமத்தைச் சேர்ந்த லோகேஷ் என்பவரும் சில ஆண்டுகளாக காதலித்து வந்துள்ளனர். ஆனால், லோகேஷின் நடத்தையில் ஏற்பட்ட அதிருப்தி காரணமாக சரிதா அவருடன் பழகுவதை நிறுத்திக் கொண்டார். இதற்கிடையில், சரிதாவின் பெற்றோர் அவருக்கு வேறு ஒரு வரனுடன் திருமண நிச்சய ஏற்பாடுகளைச் செய்தனர். வரும் 30 ஆம் தேதி இவர்களது திருமணம் நடைபெறவிருந்தது.
திருமண ஏற்பாடுகள் தீவிரமாக நடைபெற்றுக் கொண்டிருந்த நிலையில், சரிதாவுக்கு திருமணம் நடக்கவிருப்பதை அறிந்த லோகேஷ், பழிவாங்கும் நோக்கில் செயல்பட்டுள்ளார். சரிதாவுடன் அவர் முன்பு எடுத்த நெருக்கமான புகைப்படங்களை தனது வாட்ஸ்அப் ஸ்டேட்டஸ் மற்றும் பிற சமூக வலைதளங்களில் பதிவிட்டுள்ளார்.
இந்த புகைப்படங்கள் சரிதாவின் வீட்டாரும், மணமகன் வீட்டாரும் தெரியவந்ததை அடுத்து, அவர்கள் அதிர்ச்சியடைந்தனர். இதனால், திருமணத்தை உடனடியாக நிறுத்தினர். உறவினர்கள் மற்றும் ஊர் மக்கள் முன்னிலையில் திருமணம் நின்றதால், சரிதா மிகுந்த அவமானத்திற்கும், மன உளைச்சலுக்கும் ஆளாகியுள்ளார்.
மனமுடைந்த சரிதா, வீட்டில் யாரும் இல்லாத நேரத்தில் தூக்கிட்டு தற்கொலை செய்து கொண்டார். இந்த சம்பவம் குறித்து தகவலறிந்த உச்சிப்புளி போலீசார் சம்பவ இடத்திற்கு விரைந்து வந்து, சரிதாவின் உடலை மீட்டு பிரேத பரிசோதனைக்காக ராமநாதபுரம் அரசு மருத்துவமனைக்கு அனுப்பி வைக்க முயன்றனர்.
ஆனால், சரிதாவின் தற்கொலைக்கு காரணமான லோகேஷை உடனடியாக கைது செய்ய வேண்டும் என அவரது உறவினர்கள் போராட்டத்தில் ஈடுபட்டனர். உடலை வாங்க மறுத்து அவர்கள் நடத்திய போராட்டத்தால் அப்பகுதியில் பரபரப்பு ஏற்பட்டது. போலீசார் உரிய நடவடிக்கை எடுப்பதாக உறுதியளித்ததையடுத்து, உறவினர்கள் போராட்டத்தைக் கைவிட்டனர்.
தற்போது தலைமறைவாக உள்ள லோகேஷை கைது செய்ய தனிப்படை அமைத்து போலீசார் தீவிரமாக தேடி வருகின்றனர். இந்த துயரச் சம்பவம் அப்பகுதியில் பெரும் சோகத்தையும், அதிர்ச்சியையும் ஏற்படுத்தியுள்ளது.
