தமிழகத்தின் புதிய முதலமைச்சராக தவெக தலைவர் விஜய் கடந்த 10-ஆம் தேதி பதவியேற்றார். ஆளுநர் ராஜேந்திர விஸ்வநாத் அர்லேகர் முன்னிலையில் பதவிப் பிரமாணத்தை ஏற்றுக்கொண்ட அவர், முக்கிய 3 கோப்புகளில் கையெழுத்திட்டார். முதலமைச்சரான பிறகு, மு.க.ஸ்டாலின், அன்புமணி ராமதாஸ், வைகோ, திருமாவளவன், சீமான் உள்ளிட்ட முக்கிய அரசியல் தலைவர்களை நேரில் சந்தித்து வாழ்த்து பெற்றார் விஜய்.
இந்நிலையில், மக்கள் நீதி மய்யம் கட்சியின் தலைவர் கமல்ஹாசன், இன்று சென்னை நீலாங்கரையில் உள்ள முதலமைச்சர் விஜய்யின் இல்லத்திற்கு நேரில் சென்று சந்தித்தார். சுமார் 30 நிமிடங்கள் நடைபெற்ற இந்த சந்திப்பில், இருவரும் பல்வேறு விஷயங்கள் குறித்து ஆலோசனை நடத்தியதாகக் கூறப்படுகிறது.
சந்திப்புக்குப் பிறகு, கமல்ஹாசன் தனது எக்ஸ் (முன்னர் ட்விட்டர்) பக்கத்தில், 'தமிழ்நாடு முதலமைச்சர், தம்பி விஜய் அவர்களை இன்று நேரில் சந்தித்து வாழ்த்துகளைத் தெரிவித்தேன். தமிழ்நாட்டை மேம்படுத்தும் பல கனவுகளை உற்சாகத்துடன் பகிர்ந்துகொண்டார். சந்திப்பின்போது அவர் காட்டிய பண்பும் அன்பும் நெகிழ்ச்சியளித்தது' என்று பதிவிட்டுள்ளார்.
மேலும், 'பல்வேறு இடையூறுகளைச் சந்தித்து வரும் தமிழ்த் திரைப்படத் துறைக்கு தமிழ்நாடு அரசின் ஆதரவும் அரவணைப்பும் வேண்டும் என்பதை வலியுறுத்தி 6 முக்கியமான கோரிக்கைகளை அவரிடம் கொடுத்திருக்கிறேன். நன்மை மலரட்டும்' என்றும் அவர் குறிப்பிட்டுள்ளார். இந்த சந்திப்பு அரசியல் வட்டாரத்திலும், திரையுலகிலும் பெரும் எதிர்பார்ப்பை ஏற்படுத்தியுள்ளது.
