நடிகர் விஷ்ணு விஷால் நடிப்பில், கடந்த 2022-ல் வெளியாகி ரசிகர்கள் மத்தியில் பெரும் வரவேற்பைப் பெற்ற 'கட்டா குஸ்தி' திரைப்படத்தின் இரண்டாம் பாகமான 'கட்டா குஸ்தி 2' படத்தின் புதிய போஸ்டர் தற்போது வெளியாகியுள்ளது. முதல் பாகத்தின் வெற்றியைத் தொடர்ந்து, இந்த இரண்டாம் பாகத்திலும் அதே நட்சத்திரங்கள் இணைந்துள்ளனர்.
செல்லா அய்யாவு இயக்கத்தில், விஷ்ணு விஷால் மற்றும் ஐஸ்வர்யா லக்ஷ்மி நடிப்பில் வெளியான 'கட்டா குஸ்தி' திரைப்படம், ஒரு நகைச்சுவை கலந்த கதைக் களத்தைக் கொண்டிருந்தது. இந்தப் படத்திற்கு ஜஸ்டின் பிரபாகரன் இசையமைத்திருந்தார். சுமார் 5 கோடி ரூபாய் பட்ஜெட்டில் தயாரிக்கப்பட்ட இப்படம், 30 கோடி ரூபாய்க்கு மேல் வசூலித்து மாபெரும் வெற்றி பெற்றது.
இந்நிலையில், 'கட்டா குஸ்தி 2' படத்தை இயக்குநர் செல்லா அய்யாவு மீண்டும் இயக்குகிறார். விஷ்ணு விஷால் மற்றும் வேல்ஸ் ஃபிலிம் இண்டர்நேஷ்னல் நிறுவனம் இணைந்து இப்படத்தைத் தயாரிக்கின்றனர். முதல் பாகத்தைப் போலவே, கதாநாயகியாக ஐஸ்வர்யா லக்ஷ்மி நடிக்கிறார். மேலும், முனிஷ்காந்த், காளி வெங்கட், கருணாகரன் போன்றோரும் முக்கிய கதாபாத்திரங்களில் நடிக்கின்றனர்.
'கட்டா குஸ்தி 2' படத்தின் முதல் லுக் போஸ்டர் நேற்று வெளியான நிலையில், தற்போது படக்குழு இரண்டாம் லுக் போஸ்டரையும் வெளியிட்டுள்ளது. இப்படம் ஜூலை 3 ஆம் தேதி திரையரங்குகளில் வெளியாகவுள்ளது என்பதை படக்குழு அறிவித்துள்ளது.
