தமிழகத்தில் காலை 11 மணி முதல் பிற்பகல் 3.30 மணி வரை விளையாட்டுப் போட்டிகளை நடத்தக் கூடாது என அமைச்சர் ஆதவ் அர்ஜுனா உத்தரவிட்டுள்ளார். சட்டப்பேரவையில் உரையாற்றிய அவர், கோடை வெயிலின் தாக்கம் அதிகமாக இருப்பதால், பள்ளிகள் மற்றும் விளையாட்டு சங்கங்கள் நடத்தும் போட்டிகள் இந்த நேரங்களில் நடத்தப்படக் கூடாது என்று வலியுறுத்தினார். குறிப்பாக, இந்த வெயில் குழந்தைகளின் உடல் நலத்தையும், உள்ளுறுப்புகளையும் பாதிக்கும் அபாயம் உள்ளதாக அவர் கவலை தெரிவித்தார்.
இது தொடர்பாக புதிய கொள்கைகள் குறித்து துறை செயலர்களுடன் ஆலோசிக்கப்பட்டுள்ளதாகவும் அமைச்சர் குறிப்பிட்டார். மேலும், ரூ.3 கோடியில் மினி ஸ்டேடியம் அமைப்பது சாத்தியமில்லை என்றும், ஒரு டிராக் அமைப்பதற்கு மட்டுமே சுமார் ரூ.10 கோடி செலவாகும் என்றும் அவர் விளக்கினார். இதனால், திட்டங்களை மாற்றி அமைக்கும் பணி நடைபெற்று வருவதாகவும் அவர் கூறினார்.
கபடி விளையாட்டுக்காக சிறப்பு திட்டங்களை உருவாக்கவும் திட்டமிட்டுள்ளதாகவும், கபடி முக்கியமாக விளையாடப்படும் பகுதிகளில் சிறப்பு ஸ்டேடியங்கள் அமைக்கப்படும் என்றும் அமைச்சர் ஆதவ் அர்ஜுனா தெரிவித்தார். தமிழகத்தில் விளையாட்டுத் துறையில் சிறந்து விளங்கும் வீரர்களில் 60 சதவீதம் பேர் டெல்டா மாவட்டங்களைச் சேர்ந்தவர்கள் என்றும், தானும் டெல்டா பகுதியைச் சேர்ந்தவர் என்றும் அவர் பெருமிதம் தெரிவித்தார்.
சர்வதேச அளவில் பங்கேற்கும் வகையில் டெல்டா மாவட்டங்களில் உள்ள மைதானங்களில் போதிய உட்கட்டமைப்பு வசதிகள் இல்லை என்பதை அவர் சுட்டிக்காட்டினார். சென்னை நேரு விளையாட்டு அரங்கம் போன்ற நவீன விளையாட்டு அரங்கங்களை அனைத்து மாவட்டங்களிலும் உருவாக்க திட்டமிட்டுள்ளதாகவும் அவர் கூறினார். இது டெல்டா மாவட்டங்களில் விளையாட்டு மேம்பாட்டிற்கு ஒரு முக்கிய படியாக அமையும் என எதிர்பார்க்கப்படுகிறது.
