எனது அரசியல் குருவாக விடுதலைச் சிறுத்தைகள் கட்சித் தலைவர் தொல். திருமாவளவனை எப்போதும் பெருமையுடன் குறிப்பிடுவேன் என்று எதிர்க்கட்சித் தலைவர் உதயநிதி ஸ்டாலின் தெரிவித்துள்ளார். சட்டசபையில் உரையாற்றிய அவர், திமுக தலைவர் மு.க. ஸ்டாலினுக்கும் விசிக தலைவர் திருமாவளவனுக்கும் இடையேயான உறவு வெறும் தேர்தல் கூட்டணி அல்ல, அது ஒரு கொள்கைக் கூட்டணி என்றும் குறிப்பிட்டார். தனது அரசியல் குருவாக திருமாவளவனை பலமுறை குறிப்பிட்டுள்ளதாகவும், அவருக்கு என்றென்றும் நன்றியை தெரிவிப்பதாகவும் அவர் கூறினார்.
மேலும், எந்தெந்த சட்டமன்ற உறுப்பினர்களுக்கு கார் தேவையாக இருக்கிறதோ அவர்களுக்கு மட்டும் வாங்கிக் கொடுக்குமாறு கேட்டுக்கொண்டார். திமுக தலைவர் மு.க. ஸ்டாலின் எடுத்த முடிவின்படி, திமுக சட்டமன்ற உறுப்பினர்களுக்கு கார் தேவையில்லை என்றும் அவர் சுட்டிக்காட்டினார்.
கார் பந்தயத்தைப் பற்றி பேசுவதன் மூலம், நீங்கள் எங்களைக் கொச்சைப்படுத்தவில்லை, மாறாக அந்த விளையாட்டு வீரர்களையே கொச்சைப்படுத்துகிறீர்கள் என்றும் உதயநிதி ஸ்டாலின் தெரிவித்தார். இது விளையாட்டு வீரர்களின் மன உறுதியைப் பாதிக்கும் என்றும் அவர் குறிப்பிட்டார்.
2007 ஆம் ஆண்டு கடுமையான விலைவாசி உயர்வு ஏற்பட்டபோது, அன்றைய முதலமைச்சர் கலைஞர் அவர்கள், சிறப்பு பொது விநியோகத் திட்டத்தின் கீழ் பருப்பு, எண்ணெய், ரவா, மைதா போன்ற அத்தியாவசியப் பொருட்களை சந்தை விலையை விட குறைவான விலைக்கு வழங்கியதை அவர் நினைவு கூர்ந்தார். இந்த சிறப்பு பொது விநியோகத் திட்டம் இன்றும் தொடர்வதாகவும் அவர் கூறினார்.
தற்போதைய விலைவாசி உயர்வைக் கட்டுப்படுத்த, முதலமைச்சர் தலைமையில் ஒரு சிறப்பு ஆலோசனைக் கூட்டம் நடத்தி, அதற்கான தீர்வுகளைக் காண வேண்டும் என்றும் உதயநிதி ஸ்டாலின் வலியுறுத்தினார். மக்களின் சிரமங்களைக் குறைக்கும் வகையில் அரசு உடனடியாக நடவடிக்கை எடுக்க வேண்டும் என்றும் அவர் கேட்டுக்கொண்டார்.
