அமெரிக்க அதிபர் டொனால்டு ட்ரம்ப், தனது அரசு முறை பயணமாக சீனா சென்று, அந்நாட்டு அதிபர் ஜி ஜின்பிங்குடன் நேற்று வரலாற்று சிறப்புமிக்க பேச்சுவார்த்தைகளைத் தொடங்கினார். ஏறக்குறைய 10 ஆண்டுகளுக்குப் பிறகு அமெரிக்க அதிபர் ஒருவர் சீனாவுக்கு பயணம் மேற்கொள்வது இதுவே முதல்முறை. முன்னதாக, 2017-ம் ஆண்டு ட்ரம்ப் தனது முதல் பதவிக் காலத்தில் பெய்ஜிங் சென்றிருந்தார். இருநாட்டு உறவுகளிலும் ஒரு புதிய அத்தியாயத்தைத் தொடங்கும் மைல்கல் ஆண்டாக 2026 அமையும் என சீன அதிபர் நம்பிக்கை தெரிவித்தார்.
பெய்ஜிங்கில் நடைபெற்ற இந்த சந்திப்பின் போது, ட்ரம்ப் பேசுகையில், 'ஜி ஜின்பிங் ஒரு சிறந்த தலைவர். கடந்த காலங்களில் நமக்கிடையே கருத்து வேறுபாடுகள் இருந்தபோதிலும், அவற்றை நாம் சுமுகமாகத் தீர்த்துக்கொண்டோம். அமெரிக்கா – சீனா இடையே முன்னெப்போதும் இல்லாத வகையில் மிகச்சிறந்த உறவு இனிவரும் காலங்களில் அமையும். நாம் இணைந்து ஒரு அற்புதமான எதிர்காலத்தை உருவாக்குவோம்' என்றார். சீன அதிபர் ஜி ஜின்பிங் கூறுகையில், 'அமெரிக்காவும் சீனாவும் பரஸ்பரம் போட்டி நாடுகளாக இல்லாமல், கூட்டாளிகளாகச் செயல்பட வேண்டும். வர்த்தகப் போரில் எவருக்கும் வெற்றி கிடைக்காது' என்று நம்பிக்கை தெரிவித்தார்.
அதிபர் ட்ரம்புடன் எலான் மஸ்க் (டெஸ்லா), டிம் குக் (ஆப்பிள்), ஜென்சன் ஹுவாங் (என்விடியா) மற்றும் லாரி ஃபின்க் (பிளாக்ராக்) உள்ளிட்ட அமெரிக்காவின் முன்னணி தொழில் அதிபர்கள் பெய்ஜிங் சென்றுள்ளனர். 'சீனாவை இன்னும் ஒரு படி முன்னேற்றப் பாதைக்குக் கொண்டு செல்ல, இந்த திறமையான மனிதர்கள் தங்கள் மாயாஜாலத்தைப் புரிய சீனா தனது கதவுகளைத் திறந்துவிட வேண்டும் என்பதே ஜி ஜின்பிங்கிடம் எனது முதல் கோரிக்கையாக இருக்கும்' என்று ட்ரம்ப் தனது சமூக வலைதளப் பதிவில் குறிப்பிட்டுள்ளார்.
இந்த சந்திப்பின் முக்கிய விவாதப் பொருளாக மேற்கு ஆசியாவில் நிலவும் போர்ச் சூழல் மற்றும் அதன் விளைவாக ஏற்பட்டுள்ள உலகளாவிய எரிசக்தி தட்டுப்பாடு ஆகியவை இருந்தன. குறிப்பாக, ஹார்முஸ் ஜலசந்தியில் நிலவும் முடக்கத்தை முடிவுக்குக் கொண்டு வருவது குறித்து இருதரப்பும் ஆலோசித்தது. ஈரான் அணு ஆயுதங்களை உருவாக்காது என்ற உத்தரவாதத்தின் அடிப்படையில், அந்த ஜலசந்தியை மீண்டும் திறக்கச் செய்ய சீனா எடுக்கும் முயற்சிகளுக்கு அமெரிக்கா முக்கியத்துவம் அளிக்கிறது. சுமார் இரண்டு மணி நேரத்திற்கும் மேலாக நீடித்த இந்த முதல் கட்ட சந்திப்பின்போது, தைவான் விவகாரம் மற்றும் வர்த்தக வரி விதிப்புகள் குறித்தும் விவாதிக்கப்பட்டதாகத் தெரிகிறது.
