கேரளாவில் சமீபத்தில் நடைபெற்ற சட்டசபை தேர்தலில் காங்கிரஸ் தலைமையிலான ஐக்கிய ஜனநாயக முன்னணி மகத்தான வெற்றி பெற்று, 102 இடங்களை கைப்பற்றி ஆட்சியை உறுதி செய்துள்ளது. இந்த வெற்றி காங்கிரஸ் மற்றும் அதன் கூட்டணி கட்சி தொண்டர்களிடையே பெரும் உற்சாகத்தை ஏற்படுத்தியுள்ளது. எனினும், முதல்-மந்திரி யார் என்பதைத் தேர்வு செய்வதில் ஏற்பட்ட தாமதம் தொண்டர்களிடையே அதிருப்தியை வளர்த்தது.
முதல்-மந்திரி பதவிக்கு காங்கிரஸ் தேசிய பொது செயலாளர் கே.சி. வேணுகோபால், முன்னாள் எதிர்க்கட்சித் தலைவர் வி.டி. சதீசன், மற்றும் மூத்த தலைவர் ரமேஷ் சென்னித்தலா ஆகியோருக்கு இடையே கடும் போட்டி நிலவியது. மாநிலம் முழுவதும் தொண்டர்கள் தங்களுக்கு விருப்பமான தலைவருக்கு ஆதரவாக பேரணிகள் நடத்தினர்.
இந்த இழுபறி நிலையை முடிவுக்குக் கொண்டுவர, காங்கிரஸ் மேலிடக் குழுவினர் திருவனந்தபுரத்திற்கு வந்து ஆலோசனை நடத்தினர். ஆனால், எந்தத் தீர்வும் எட்டப்படாததால் அவர்கள் ஏமாற்றத்துடன் டெல்லி திரும்பினர். தொடர்ந்து, வேணுகோபால் உள்ளிட்ட மூவரையும் காங்கிரஸ் மேலிடம் டெல்லிக்கு அழைத்தது. அங்கு காங்கிரஸ் தலைவர் மல்லிகார்ஜுன கார்கே மற்றும் நாடாளுமன்ற எதிர்க்கட்சித் தலைவர் ராகுல் காந்தி ஆகியோர் பல மணி நேரம் பேச்சுவார்த்தை நடத்தினர். இருப்பினும், மூவருமே முதல்-மந்திரி பதவி தங்களுக்கு வேண்டும் என்பதில் உறுதியாக இருந்ததால், இந்தப் பேச்சுவார்த்தையிலும் முடிவு எட்டப்படவில்லை.
இதையடுத்து, கேரள காங்கிரஸ் முன்னாள் தலைவர்களிடம் கருத்து கேட்க கட்சி மேலிடம் அவர்களை டெல்லிக்கு அழைத்தது. சுதாகரன், முரளிதரன், சுதீ ரன், எம்.எம்.அசன், முல்லப் பள்ளி ராமச்சந்திரன் ஆகியோர் டெல்லிக்கு விரைந்தனர். மேலும், மூத்த தலைவர் ஏ.கே. ஆண்டோனியிடமும் கருத்து கேட்கப்பட்டது. தற்போது, பிரியங்கா காந்தியும் இந்த விவகாரத்தில் தலையிட்டு தீர்வு காணும் முயற்சியில் ஈடுபட்டுள்ளார். நேற்று மாலை நடைபெற்ற முக்கியக் கூட்டத்தில் இறுதி முடிவு எடுக்கப்பட்டதாகக் கூறப்படுகிறது. இதன் விளைவாக, கேரள மாநில காங்கிரஸ் கமிட்டியின் துணைத் தலைவரும், முன்னாள் எதிர்க்கட்சித் தலைவருமான வீ.டி. சதீசன், கேரளாவின் புதிய முதல்-மந்திரியாக அறிவிக்கப்பட்டுள்ளார். 10 ஆண்டுகளுக்குப் பிறகு கேரளாவில் காங்கிரஸ் ஆட்சி அமைக்கிறது. இந்த அறிவிப்பைத் தொடர்ந்து, காங்கிரஸ் அலுவலகங்களில் தொண்டர்கள் இனிப்புகள் வழங்கியும், பட்டாசுகள் வெடித்தும் கொண்டாட்டத்தில் ஈடுபட்டனர்.
