ஐதராபாத்தில் அதிவேகமாக சென்றுகொண்டிருந்த காரின் திறந்த டிக்கியில் மூன்று குழந்தைகள் பயணம் செய்த வீடியோ ஒன்று சமூக வலைத்தளங்களில் வெளியாகி பெரும் அதிர்ச்சியை ஏற்படுத்தியுள்ளது. இந்த வீடியோ வைரலானதை அடுத்து, போக்குவரத்து காவல்துறை உடனடியாக நடவடிக்கை எடுத்துள்ளது.
வீடியோவில், மணிக்கு 100 கிலோமீட்டருக்கும் அதிகமான வேகத்தில் கார் சீறிப்பாய்ந்து செல்லும்போது, குழந்தைகள் டிக்கியில் அமர்ந்து தங்கள் சமநிலையை தக்கவைக்க போராடும் காட்சி பதிவாகியுள்ளது. இந்த ஆபத்தான பயணத்தை கண்ட பொதுமக்கள் கடும் சீற்றமடைந்துள்ளனர். சாலையில் மற்ற வாகனங்கள் வேகமாக கடந்து செல்லும்போது, குழந்தைகள் கீழே விழாமல் இருக்க தவிப்பது காண்போரை கலக்கமடைய செய்துள்ளது.
இதுகுறித்து சைபராபாத் போக்குவரத்து காவல்துறை ஒரு அறிக்கையை வெளியிட்டுள்ளது. அந்த அறிக்கையில், "சம்பந்தப்பட்ட வாகனத்திற்கு அபராதம் விதிக்கப்பட்டுள்ளது. ஆனால், வாகனத்தின் உரிமையாளர் சம்பவத்தின்போது அங்கு இல்லை. இருப்பினும், தொலைபேசி வாயிலாக அவரை தொடர்புகொண்டு, இதுபோன்ற உயிரைப் பறிக்கும் செயல்களில் ஈடுபட வேண்டாம் என்றும், எதிர்காலத்தில் போக்குவரத்து விதிகளை மீற வேண்டாம் என்றும் கடுமையாக எச்சரித்துள்ளோம்" என்று தெரிவிக்கப்பட்டுள்ளது.
பொதுமக்களின் பாதுகாப்பு என்பது மிகவும் முக்கியமானது. இதுபோன்ற பொறுப்பற்ற செயல்கள் ஒருபோதும் அனுமதிக்கப்படாது. குழந்தைகள் மற்றும் பொதுமக்களின் பாதுகாப்பை உறுதிசெய்ய அனைத்து நடவடிக்கைகளும் எடுக்கப்படும். இந்த சம்பவம் குறித்த மேலதிக விசாரணை நடைபெற்று வருகிறது.
