சினிமாவில் வாய்ப்பு தருவதாகக் கூறி, பண்ணை வீட்டிற்கு அழைப்பு விடுத்ததுடன், ரூ.25 லட்சம் தருவதாகவும் ஆசை காட்டியதாக நடிகை கிரக் சீதா பரபரப்பு குற்றச்சாட்டை முன்வைத்துள்ளார். இது திரையுலகில் மீண்டும் 'காஸ்டிங் கவுச்' விவகாரத்தை தீவிரமாக விவாதிக்க வைத்துள்ளது.
'பிக்பாஸ்' தெலுங்கு சீசன் 8 நிகழ்ச்சியின் மூலம் பிரபலமான நடிகை கிரக் சீதா, சமீபத்தில் அளித்த பேட்டி ஒன்றில் இந்த அதிர்ச்சிகரமான தகவலை பகிர்ந்துள்ளார். திறமை உள்ளவர்களுக்கு வாய்ப்பு கிடைக்கும் என்று நம்பி சினிமா துறைக்கு வரும் பெண்களை குறிவைத்து சிலர் இதுபோன்ற பாலியல் ரீதியான துன்புறுத்தல்களில் ஈடுபடுவதாக அவர் வேதனை தெரிவித்தார்.
சினிமாவில் பெரிய வாய்ப்பு பெற்றுத் தருவதாகக் கூறி, சிலர் தன்னை பண்ணை வீட்டிற்கு வருமாறு அழைத்ததாகவும், அதற்கு இணங்கினால் ரூ.25 லட்சம் தருவதாகவும் கூறியதாகவும் கிரக் சீதா தெரிவித்துள்ளார். ஆனால், இந்த கீழ்த்தரமான பேரம் பேசுவதை தான் உடனடியாக நிராகரித்துவிட்டதாகவும் அவர் திட்டவட்டமாக கூறியுள்ளார்.
கிரக் சீதாவின் இந்த தைரியமான குற்றச்சாட்டுக்கு சமூக வலைதளங்களில் பலரும் ஆதரவு தெரிவித்து வருகின்றனர். அவரது இந்த கருத்துக்கள், திரையுலகில் நிலவும் 'காஸ்டிங் கவுச்' பிரச்சனையின் தீவிரத்தை மீண்டும் ஒருமுறை வெளிச்சம் போட்டுக் காட்டியுள்ளதுடன், டோலிவுட் வட்டாரத்தில் பெரும் பரபரப்பை ஏற்படுத்தியுள்ளது.
