இங்கிலாந்துக்கு எதிரான முதல் டி20 போட்டியில் இந்திய வீரர் அபிஷேக் சர்மா, சர்வதேச டி20 கிரிக்கெட்டில் மிகக் குறைந்த பந்துகளில் 100 சிக்ஸர்கள் அடித்து உலக சாதனை படைத்துள்ளார். செஸ்டர்-லீ-ஸ்ட்ரீட்டில் நடைபெற்ற இந்த ஆட்டத்தில், ஆரம்பத்தில் இந்திய அணி விக்கெட் சரிவை சந்தித்தபோது, அபிஷேக் சர்மா அதிரடியாக விளையாடி அணியை மீட்டெடுத்தார். சஞ்சு சாம்சன், இஷான் கிஷன் ஆகியோர் விரைவில் ஆட்டமிழந்த நிலையில், லியாம் டாசன் மற்றும் சாகிப் மஹ்மூத் பந்துவீச்சை எதிர்கொண்ட அபிஷேக், அடுத்தடுத்து பவுண்டரிகளை விளாசி ரன் வேகத்தை அதிகரித்தார்.
டாசன் வீசிய பந்தில் ஒரு இன்சைடு-அவுட் சிக்ஸரையும், அதைத் தொடர்ந்து மஹ்மூத் பந்துவீச்சில் அடுத்தடுத்த சிக்ஸர்களையும் அடித்து அபிஷேக் சர்மா தனது 100-வது சர்வதேச டி20 சிக்ஸரைப் பதிவு செய்தார். வெறும் 785 பந்துகளில் இந்த மைல்கல்லை எட்டியதன் மூலம், முழு உறுப்பினர் நாடுகளின் வீரர்களில் மிகக் குறைந்த பந்துகளில் இந்த சாதனையை படைத்த பேட்டர் என்ற வரலாற்றுச் சாதனையை அவர் படைத்துள்ளார். இதற்கு முன்பு வெஸ்ட் இண்டீஸ் வீரர் எவின் லூயிஸ் படைத்திருந்த சாதனையை அவர் முறியடித்துள்ளார்.
முழு உறுப்பினர் நாடுகளின் பட்டியலில், அபிஷேக் சர்மா 785 பந்துகளுடன் முதலிடம் பிடித்துள்ளார். அவருக்கு அடுத்தபடியாக வெஸ்ட் இண்டீஸ் வீரர் எவின் லூயிஸ் 789 பந்துகளிலும், நியூசிலாந்தின் ஃபின் ஆலன் 871 பந்துகளிலும் இந்த இலக்கை எட்டியுள்ளனர். இவர்களைத் தொடர்ந்து டிம் டேவிட் (931 பந்துகள்), காலின் முன்ரோ (963 பந்துகள்) மற்றும் இந்தியாவின் சூர்யகுமார் யாதவ் (1007 பந்துகள்) ஆகியோர் அடுத்தடுத்த இடங்களில் உள்ளனர். மேலும், சர்வதேச டி20 கிரிக்கெட்டில் அதிக சிக்சர்கள் அடித்த இந்திய வீரர்கள் பட்டியலில் ராகுலின் சாதனையையும் அபிஷேக் முறியடித்தார். ராகுல் 99 சிக்சர்கள் அடித்த நிலையில், அபிஷேக் 100 சிக்ஸர்களை அடித்துள்ளார்.
இந்திய அணியின் விக்கெட்டுகள் சரிந்த போதிலும், இங்கிலாந்து பந்துவீச்சாளர்களைத் துணிச்சலாக எதிர்கொண்டு அபிஷேக் சர்மா ரன்களைக் குவித்தார். வெறும் 20 பந்துகளில் அரைசதம் கடந்த அவர், 200-க்கும் அதிகமான ஸ்டிரைக் ரேட்டில் விளையாடி அணியை சரிவிலிருந்து மீட்டார். இதன் மூலம் 20 பந்துகள் மற்றும் அதற்கு கீழ் மட்டுமே பந்தை எதிர்கொண்டு இதுவரை 5 முறை அரைசதம் எடுத்துள்ளார். இறுதியில் சாம் கர்ரன் பந்துவீச்சில் 24 பந்துகளில் 59 ரன்கள் எடுத்து அவர் ஆட்டமிழந்தார். எனினும், அவரது அதிரடியால் 10 ஓவர்களில் இந்திய அணி 3 விக்கெட் இழப்பிற்கு 99 ரன்களை எட்டியது. முன்னதாக, டாஸ் வென்ற இந்திய அணி முதலில் பேட்டிங் செய்ய தீர்மானித்தது. கேப்டன் ஐயர், இந்திய அணி மூன்று ஸ்பின்னர்களுடன் களம் இறங்குவதாக தெரிவித்தார்.
