மும்பை: அயர்லாந்துக்கு எதிரான டி20 தொடரை 0-2 என்ற கணக்கில் இந்திய அணி பறிகொடுத்த நிலையில், இதற்கு முன்னதாக இந்திய அணி எப்போது டி20 தொடரை இழந்தது என்ற தகவல் தற்போது வெளியாகியுள்ளது. சர்வதேச டி20 கிரிக்கெட்டில் மிகவும் வலுவான அணியாக வலம் வரும் இந்தியா, அயர்லாந்து தொடருக்கு முன்னதாக தொடர்ந்து 14 இருதரப்பு டி20 தொடர்களில் தோல்வியே சந்திக்காமல் அசைக்க முடியாத பலத்துடன் இருந்தது. இது 2020-ஆம் ஆண்டிற்குப் பிறகு இந்திய அணி இழந்த மூன்றாவது இருதரப்பு டி20 தொடர் ஆகும்.
அயர்லாந்துக்கு எதிரான இந்தத் தோல்விக்கு முன்னதாக, கடைசியாக கடந்த 2023 ஆகஸ்ட் மாதம் நடைபெற்ற வெஸ்ட் இண்டீஸுக்கு எதிரான டி20 தொடரை இந்திய அணி இழந்திருந்தது. அப்போது வெஸ்ட் இண்டீஸில் சுற்றுப்பயணம் மேற்கொண்ட இந்திய அணி 5 போட்டிகள் கொண்ட டி20 தொடரில் விளையாடியது. அந்தத் தொடரின் முதல் போட்டியில் 4 ரன்கள் வித்தியாசத்திலும், இரண்டாவது போட்டியில் 2 விக்கெட்டுகள் வித்தியாசத்திலும் இந்தியா தோல்வியடைந்து 0-2 எனப் பின்தங்கியது. பின்னர் அடுத்த 2 போட்டிகளில் சிறப்பாக விளையாடி 2-2 என தொடரை சமன் செய்தது. ஆனால், அமெரிக்காவின் லாடர்ஹில் நகரில் நடைபெற்ற வெற்றியாளரைத் தீர்மானிக்கும் இறுதிப் போட்டியில் முதலில் பேட்டிங் செய்த இந்தியா 165/9 ரன்கள் மட்டுமே எடுத்தது. இதனை வெஸ்ட் இண்டீஸ் அணி எளிதாக சேஸ் செய்து 3-2 என்ற கணக்கில் தொடரைக் கைப்பற்றியது.
அதன் பிறகு சுமார் 3 ஆண்டுகள் கழித்து தற்போது அயர்லாந்து மண்ணில் இந்திய அணி டி20 தொடரை இழந்துள்ளது. பெல்ஃபாஸ்டில் நடைபெற்ற இரண்டாவது போட்டியில் முதலில் விளையாடிய அயர்லாந்து 8 விக்கெட் இழப்பிற்கு 154 ரன்கள் எடுத்தது. தொடர்ந்து விளையாடிய இந்திய அணி 9 விக்கெட் இழப்பிற்கு 153 ரன்கள் மட்டுமே எடுத்து 1 ரன் வித்தியாசத்தில் தோல்வியடைந்தது. அயர்லாந்து பந்துவீச்சாளர் ஜெய் முந்த்ரா 3 விக்கெட்டுகளை வீழ்த்தி இந்தியாவின் தோல்விக்குக் காரணமானார். இந்த வரலாற்றுத் தோல்வி இந்திய கிரிக்கெட் வட்டாரத்தில் பெரும் அதிர்வலைகளை ஏற்படுத்தியுள்ளது.
IND vs IRE: இந்தியாவின் தோல்வியிலும் பிரின்ஸ் யாதவ் செய்த சாதனை.. கடைசி பந்தில் செய்த சம்பவம். உலகக்கோப்பையிலிருந்து இந்தியா வெளியேற்றம்.. “என் வேலையை சரியாக செய்ததாக..”.. ஹர்மன்பிரீத் வேதனை.
