தம்புலாவில் நடைபெற்ற முத்தரப்பு ஒருநாள் தொடரின் இறுதிப் போட்டியில், இந்திய ஏ அணிக்காக விளையாடிய வைபவ் சூர்யவன்ஷி, இலங்கை ஏ அணிக்கு எதிராக அதிரடியாக விளையாடினார். அவர் 29 பந்துகளில் 10 பவுண்டரிகள் மற்றும் 8 சிக்ஸர்கள் அடித்து 94 ரன்கள் குவித்தார். லிஸ்ட் ஏ கிரிக்கெட்டில் அதிவேக சதம் அடிக்கும் வாய்ப்பு இருந்தும், அவர் ஆட்டமிழந்து வெளியேறியது சோகத்தை ஏற்படுத்தியது. எனினும், இலங்கை வீரர்கள் கைதட்டி அவரை பாராட்டி வழியனுப்பி வைத்தனர்.
முன்னதாக, லீக் போட்டியில் சூப்பர் ஓவர் வரை சென்ற ஆட்டத்தில் இலங்கை ஏ அணி வெற்றி பெற்றபோது, வைபவ் சூர்யவன்ஷியை இலங்கை வீரர்கள் கேலி செய்தனர். இதற்கு பதிலடியாக, இறுதிப் போட்டியில் வைபவ் சூர்யவன்ஷி அதிரடியாக விளையாடினார். டாஸ் வென்ற இலங்கை அணி முதலில் பந்துவீச்சை தேர்வு செய்தது. பிரியன்ஷ் ஆர்யாவுடன் இணைந்து விளையாடிய வைபவ் சூர்யவன்ஷி, முதல் பந்திலேயே பவுண்டரி அடித்து தனது அதிரடியைத் தொடங்கினார். 3வது ஓவரில் மட்டும் 3 சிக்ஸர்கள் மற்றும் 2 பவுண்டரிகளுடன் 26 ரன்களை விளாசிய அவர், வெறும் 11 பந்துகளில் அரைசதம் அடித்து புதிய சாதனை படைத்தார்.
வைபவ் சூர்யவன்ஷி தனது அதிரடியை நிறுத்தாமல், தொடர்ந்து சிக்ஸர்கள் மற்றும் பவுண்டரிகளாக அடித்து இலங்கை பந்துவீச்சாளர்களை திணறடித்தார். இந்திய அணியின் ஸ்கோர் 7 ஓவர்களில் விக்கெட் இழப்பின்றி 116 ரன்களை எட்டியது. இதனால், 10 ஓவர்களுக்குள் சதம் அடிக்கும் முதல் வீரர் என்ற சாதனையை அவர் படைப்பார் என எதிர்பார்க்கப்பட்டது. ஆனால், 94 ரன்கள் எடுத்திருந்தபோது, பவுண்டரி அடிக்க முயன்று அடித்த ஷாட், மிட் ஆஃப் திசையில் நின்ற வியாஸ்காந்த் வசம் கேட்ச்சானது. இதனால், அவர் தனது சாதனை சதத்தை தவறவிட்டார்.
வைபவ் சூர்யவன்ஷியின் விக்கெட் வீழ்த்தப்பட்டதும் இலங்கை வீரர்கள் நிம்மதி அடைந்தனர். கடந்த போட்டியில் நடந்த சம்பவங்களுக்கு மாறாக, வைபவ் சூர்யவன்ஷி ஆட்டமிழந்து வெளியேறும்போது, இலங்கை விக்கெட் கீப்பர் மற்றும் சக வீரர்கள் அவரை பாராட்டி வழியனுப்பி வைத்தனர். இது ரசிகர்களுக்கு நெகிழ்ச்சியை ஏற்படுத்தியது.
