2008 ஐபிஎல் தொடரின் போது ஏற்பட்ட மோதல் காரணமாக, முன்னாள் இந்திய கிரிக்கெட் வீரர்களான ஸ்ரீசாந்த் மற்றும் ஹர்பஜன் சிங் இடையே நீண்டகால பகை நீடித்து வருகிறது. அப்போது ஹர்பஜன் சிங், ஸ்ரீசாந்தை அறைந்த சம்பவம் பெரும் சர்ச்சையை ஏற்படுத்தியது. இந்தச் சம்பவம் தன்னை எவ்வாறு பாதித்தது என ஸ்ரீசாந்த் ஏற்கனவே விவரித்துள்ளார். இந்நிலையில், ஸ்ரீசாந்த் குத்துச்சண்டை போட்டிக்கு அழைப்பு விடுத்த நிலையில், ஹர்பஜன் சிங் சமூக ஊடகத்தில் மறைமுகமாக பதிலளித்துள்ளார்.
ஸ்ரீசாந்த் அளித்த பேட்டியின் போது, குத்துச்சண்டை கையுறைகளுடன் இருக்கும் பழைய புகைப்படம் காட்டப்பட்டது. அதைப் பார்த்த ஸ்ரீசாந்த், 'என்னுடன் குத்துச்சண்டை வளையத்திற்குள் வர உங்களுக்கு தைரியம் இருக்கிறதா? இதே கையுறைகளை அணிந்து மோதிப் பார்ப்போம், வாருங்கள். இது உங்களுக்கு நான் விடுக்கும் பகிரங்க சவால்' என்று ஹர்பஜன் சிங்குக்கு அழைப்பு விடுத்தார். மேலும், 'அறைந்த சம்பவத்திலும் என் மீதும் உங்களுக்கு அவ்வளவு பிரச்சனை இருந்தால், ரிங்கிற்குள் வாருங்கள். என் மனதார உங்களை அழைக்கிறேன்' என்றும் அவர் கூறினார்.
ஸ்ரீசாந்தின் சவால் வெளியான சில மணி நேரங்களிலேயே, ஹர்பஜன் சிங் தனது இன்ஸ்டாகிராம் பக்கத்தில் ஒரு வீடியோவைப் பகிர்ந்துள்ளார். அதில் அவர் ஸ்ரீசாந்தின் பெயரை நேரடியாகக் குறிப்பிடவில்லை என்றாலும், 'வீணாகப் பேசுபவர்களைப் பேச விடுங்கள், எப்போதும் வெற்றுப் பாத்திரங்கள் தான் அதிக சத்தம் போடும்' என்று குறிப்பிட்டுள்ளார். இந்த வீடியோ ஸ்ரீசாந்தின் சவாலுக்கு ஹர்பஜன் அளித்த பதிலடிதான் என கிரிக்கெட் ரசிகர்கள் சமூக ஊடகங்களில் கருத்து தெரிவித்து வருகின்றனர்.
ஐபிஎல் முன்னாள் தலைவர் லலித் மோடி, அறைந்த சம்பவத்தின் வீடியோவை வெளியிடாத நிலையில், இந்த மோதல் மீண்டும் சூடுபிடித்துள்ளது. ஹர்பஜன் சிங் இந்த சம்பவத்தை நகைச்சுவையாக சித்தரிக்கும் வகையில் ஒரு விளம்பரத்திலும் நடித்திருந்தார். தற்போது ஸ்ரீசாந்தின் குத்துச்சண்டை சவாலுக்கு ஹர்பஜன் சிங் மறைமுகமாக பதிலளித்திருப்பது, இந்த விவகாரத்தை மேலும் பரபரப்பாக்கியுள்ளது.
