ஹரியானா மாநிலத்தைச் சேர்ந்த சிவன் பக்தர் ஒருவர், கடந்த 12 ஆண்டுகளாக நின்றுகொண்டே தவம் செய்யும் காட்சி தற்போது இணையத்தில் பரவலாகப் பகிரப்பட்டு வருகிறது. புராணங்களில் முனிவர்கள் இறைவனை காண கடுந்தவம் புரிந்ததாக நாம் கேட்டிருக்கிறோம். அந்த வகையில், ஹரியானாவைச் சேர்ந்த துலால் கிரி ஜி மகாராஜ் என்பவர், தனது கல்லூரிப் படிப்பை பாதியிலேயே நிறுத்திவிட்டு ஆன்மீகப் பாதையில் பயணிக்கத் தொடங்கினார். இந்து தெய்வமான சிவனைக் காண முடியும் என்ற நம்பிக்கையில், தீவிர துறவறத்தை மேற்கொண்டு 12 ஆண்டுகளாக அவர் நிற்கிறார்.
துலால் கிரி ஜி மகாராஜின் புகைப்படங்களும் காணொளிகளும் சமூக வலைத்தளங்களில் வைரலாகி வருகின்றன. அவரது கால்கள் வீங்கி கருமையாக மாறியுள்ளதை புகைப்படங்களில் காண முடிகிறது. ஓய்வெடுக்கும் நேரத்திலோ அல்லது உறங்கும்போதோ கூட, கீழே விழாமல் உடலைத் தாங்கிப் பிடிப்பதற்காக பெல்ட்கள் அல்லது கயிறுகள் போன்ற சாதனங்களைப் பிடித்துக்கொண்டே அவர் நிற்பதாகக் கூறப்படுகிறது.
பல ஆண்டுகளாக நின்றுகொண்டே இருந்ததன் காரணமாக, அவரது கால்களில் இரத்த ஓட்டம் பாதிக்கப்பட்டு, வீக்கமும் நிற மாற்றமும் ஏற்பட்டதாகத் தகவல்கள் தெரிவிக்கின்றன. இந்த அசாதாரண பக்தியின் காட்சிகள் பலரையும் வியப்பில் ஆழ்த்தியுள்ளது.
இறைவனை அடையும் வழியில் இத்தகைய கடுமையான விரதங்களை பக்தர்கள் மேற்கொள்வது, ஆன்மீகத்தின் மீதுள்ள அசைக்க முடியாத நம்பிக்கையை வெளிப்படுத்துவதாக அமைந்துள்ளது.
