இங்கிலாந்தில் நடந்து வரும் 2026 மகளிர் டி20 உலகக் கோப்பை தொடரில் இந்திய அணிக்கு பெரும் பின்னடைவு ஏற்பட்டுள்ளது. அணியின் முக்கிய சுழற்பந்து வீச்சாளர் ஸ்ரேயங்கா பாட்டீல், கணுக்கால் காயம் காரணமாக தொடரிலிருந்து விலகியுள்ளார். அவருக்கு பதிலாக பிரேமா ராவத் மாற்று வீராங்கனையாக அணியில் சேர்க்கப்பட்டுள்ளார்.
நெதர்லாந்துக்கு எதிரான போட்டியில் பந்தை தடுக்க முயன்றபோது ஸ்ரேயங்காவின் வலது கணுக்காலில் பலத்த காயம் ஏற்பட்டது. மருத்துவ பரிசோதனையில் அவரது கணுக்கால் தசைநார் கிழிந்திருப்பது உறுதியானதால், அவர் தொடரிலிருந்து விலக நேரிட்டது. 23 வயதான ஸ்ரேயங்கா, இதற்கு முன்னர் 2024 உலகக் கோப்பையையும் விரல் எலும்பு முறிவு காரணமாக தவறவிட்டார். இதுவரை 24 சர்வதேச டி20 போட்டிகளில் விளையாடி 29 விக்கெட்டுகளை வீழ்த்தியுள்ளார்.
ஸ்ரேயங்காவிற்கு மாற்றாக 24 வயதான லெக் ஸ்பின்னர் பிரேமா ராவத் அணியில் இணைந்துள்ளார். உத்தரகாண்ட் மாநிலத்தைச் சேர்ந்த இவர், மகளிர் பிரீமியர் லீக்கில் ராயல் சேலஞ்சர்ஸ் பெங்களூரு அணிக்காக விளையாடி வருகிறார். இந்தியா 'ஏ' அணியில் சிறப்பாக செயல்பட்ட இவருக்கு, தற்போது முதல் முறையாக தேசிய அணியில் விளையாடும் வாய்ப்பு கிடைத்துள்ளது.
ஹர்மன்பிரீத் கவுர் தலைமையிலான இந்திய அணி, உலகக் கோப்பையில் பாகிஸ்தானை 64 ரன்கள் வித்தியாசத்திலும், நெதர்லாந்தை 114 ரன்களுக்கு சுருட்டியும் அபார வெற்றி பெற்றுள்ளது. புள்ளிப்பட்டியலில் வலுவான நிலையில் உள்ள இந்திய அணி, வரும் ஞாயிற்றுக்கிழமை தென்னாப்பிரிக்க அணியை மான்செஸ்டரில் எதிர்கொள்கிறது. இந்த முக்கியமான கட்டத்தில் ஸ்ரேயங்காவின் விலகல் இந்திய அணிக்கு சற்று பின்னடைவாக கருதப்படுகிறது.
