தமிழகத்தின் நிதிநிலை குறித்த அதிர்ச்சி தகவல்கள் வெளியாகியுள்ளன. அரசின் வருவாய் பற்றாக்குறை வரலாறு காணாத உச்சத்தை எட்டியுள்ளதாகவும், வரி வருவாய் வீழ்ச்சி கண்டுள்ளதாகவும் அமைச்சர் மரிய வில்சன் தெரிவித்துள்ளார்.
தமிழக அரசின் நிதி நிலை குறித்த வெள்ளை அறிக்கையை அமைச்சர் மரிய வில்சன் வெளியிட்டார். அப்போது அவர் கூறுகையில், "தமிழக வருவாய் பற்றாக்குறை வரலாறு காணாத உச்சம் அடைந்துள்ளது. வரி வருவாய் வரலாறு காணாத வீழ்ச்சியை கண்டுள்ளது. ரூ.10 லட்சம் கோடி நேரடி கடன், ரூ.78 ஆயிரத்து 324 கோடி வருவாய் பற்றாக்குறை உள்ளது. இது வரலாறு காணாத உச்சம் ஆகும்," என்று தெரிவித்தார்.
மேலும், "அரசின் வருவாய் ஒவ்வொரு ரூபாயிலும் 22.8 பைசா வட்டிக்கே செலவாகிறது. பொதுத்துறை நிறுவன கடனையும் சேர்த்தால் மாநிலத்தின் உண்மையான கடன் ரூ.13.18 லட்சம் கோடி" என்றும் அவர் கூறினார். இது தமிழகத்தின் நிதி நிலை குறித்த கவலையை அதிகரித்துள்ளது.
தனிநபர் மீதான கடன் சுமை குறித்தும் அவர் விளக்கினார். 2020-21ம் ஆண்டு தனிநபர் மீது ரூ.67,087 ஆக இருந்த கடன் தொகை, தற்போது ரூ.1,28,934 ஆக உயர்ந்துள்ளது. இந்த திடீர் உயர்வு தனிநபர் மீதான நிதிச்சுமையை உணர்த்துகிறது.
