தவெகவின் கைக்கூலியாக சி.வி.சண்முகம் செயல்படுவதாக அதிமுக விழுப்புரம் மாவட்ட செயலாளர் பசுபதி கடுமையாக விமர்சித்துள்ளார். இது தொடர்பாக அவர் செய்தியாளர்களிடம் பேசுகையில், 'சோஃபா வந்தது, விஜய் நேரில் வந்து சந்தித்தார். எனவே ஆதரவு கொடுத்தார். தற்போது தவெகவில் யாரும் மதிக்காததால் மீண்டும் அதிமுக வருகிறேன், பொறுப்பு கொடுங்கள் எனக் கேட்கிறார். இது எந்த விதத்தில் நியாயம்?' என்று கேள்வி எழுப்பினார்.
முன்னதாக, செய்தியாளர்களிடம் பேசிய சி.வி.சண்முகம், 'மகனை அரசியலுக்கு கொண்டு வர இபிஎஸ் நாடகம் ஆடுகிறார். அதிமுகவின் தொடர் தோல்விகளுக்கு யாரும் பொறுப்பேற்கவில்லை. திமுகவுடன் கூட்டணி என்ற கருத்தை மட்டும் தான் ஏற்க முடியவில்லை. திமுகவுடன் கூட்டணி வைக்க வேண்டும் என்று திட்டமிட்ட போதே அதிமுக தனது சுயத்தை இழந்துவிட்டது. 8 ஆண்டுகளாக இபிஎஸ் சொன்ன அனைத்தையும் செய்தோம், அந்த பாவத்திற்காக தற்போது அனுபவித்து இருக்கிறோம்' என்று குற்றஞ்சாட்டியிருந்தார்.
தற்போதைய அரசியல் சூழலில், அதிமுகவில் உட்கட்சி பூசல் தீவிரமடைந்துள்ள நிலையில், மாவட்ட செயலாளரின் இந்த குற்றச்சாட்டு மேலும் பரபரப்பை ஏற்படுத்தியுள்ளது. சி.வி.சண்முகத்தின் அடுத்தகட்ட நடவடிக்கை என்னவாக இருக்கும் என்ற எதிர்பார்ப்பு அரசியல் வட்டாரங்களில் நிலவுகிறது.
இந்த குற்றச்சாட்டுக்கள் அதிமுகவின் எதிர்கால அரசியல் நகர்வுகளுக்கு எந்த விதத்தில் தாக்கத்தை ஏற்படுத்தும் என்பதை பொறுத்திருந்துதான் பார்க்க வேண்டும். மேலும், இது குறித்து இரு தரப்பிலிருந்தும் மேலும் பல கருத்துக்கள் வெளியாகலாம் என எதிர்பார்க்கப்படுகிறது.
