செங்கல்பட்டு மாவட்டத்தில் பெரும் அரசியல் பரபரப்பு ஏற்பட்டுள்ளது. மதுராந்தகம் முன்னாள் எம்எல்ஏ மரகதம் குமரவேல் தலைமையில், செங்கல்பட்டு மாவட்ட அதிமுக நிர்வாகிகள் மற்றும் தொண்டர்கள் த.வெ.க.வில் இணைய பிரம்மாண்ட ஏற்பாடுகள் தீவிரமாக நடைபெற்று வருகின்றன. த.வெ.க. தலைவர் விஜய் இந்த நிகழ்ச்சியில் பங்கேற்பார் என தகவல்கள் தெரிவிக்கின்றன.
தமிழக சட்டமன்றத் தேர்தல் முடிவுகள் அதிமுகவை கடுமையாக பாதித்துள்ளன. 54 ஆண்டுகால அதிமுக வரலாற்றில், எதிர்க்கட்சி அந்தஸ்தை இழப்பது இது இரண்டாவது முறையாகும். கொங்கு மண்டலத்திலும் எதிர்பார்த்த வெற்றி கிடைக்காதது எடப்பாடி பழனிசாமிக்கு பெரும் பின்னடைவை ஏற்படுத்தியுள்ளது. சட்டமன்றத்தில் த.வெ.க.வுக்கு ஆதரவளித்தது, எஸ்.பி.வேலுமணி, தங்கமணி தலைமையில் புதிய அணி உருவானது, 4 எம்எல்ஏக்கள் ராஜினாமா செய்தது போன்ற அடுத்தடுத்த அதிர்ச்சிகள் எடப்பாடியை நிலைகுலையச் செய்துள்ளன.
எஸ்.பி.வேலுமணி மற்றும் தங்கமணி ஆகியோர் மன்னிப்பு கோரிய போதிலும், கட்சியில் அவர்கள் வகித்த பதவிகளை திரும்பத் தரும் எண்ணத்தில் எடப்பாடி பழனிசாமி இல்லை என கூறப்படுகிறது. இதனால், மணி டீம் த.வெ.க.வில் இணைந்துவிடலாமா என ஆலோசித்து வருவதாக தெரிகிறது. இதேபோல், சென்னை மாவட்ட செயலாளர்களான ராஜேஷ், தி.நகர் சத்யா, விருகை ரவி உள்ளிட்டோரும் திமுகவில் இணைய காத்திருப்பதாக செய்திகள் வெளியாகியுள்ளன.
இதனிடையே, விஜய்யின் பிறந்தநாளான ஜூன் 22 அன்று, அதிமுக முன்னாள் அமைப்பாளர் சி.த.செல்லப்பாண்டியன் மற்றும் சிவகங்கை மாவட்டச் செயலாளர் செந்தில்நாதன் ஆகியோர் த.வெ.க.வில் இணைய உள்ளதாக தகவல்கள் தெரிவிக்கின்றன. இந்த நிகழ்வுகள் எடப்பாடி பழனிசாமிக்கு பெரும் அதிர்ச்சியை ஏற்படுத்தியுள்ளன. செங்கல்பட்டு மாவட்ட அரசியலில் இது ஒரு முக்கிய திருப்புமுனையாக பார்க்கப்படுகிறது.
