அதிமுகவின் இரட்டை இலை சின்னத்தில் போட்டியிட்டு வெற்றி பெற்ற மதுராந்தகம், தாராபுரம், பெருந்துறை மற்றும் அம்பாசமுத்திரம் தொகுதி சட்டமன்ற உறுப்பினர்கள் 4 பேர் திடீரென தங்கள் பதவிகளை ராஜினாமா செய்துவிட்டு, ஆளும் கட்சியான தமிழக வெற்றிக் கழகத்தில் (தவெக) இணைந்தனர். இதுதொடர்பாக, கட்சித் தாவல் தடைச் சட்டத்தின் கீழ் நடவடிக்கை எடுக்கக் கோரி அதிமுக தலைமை அளித்த மனுவின் அடிப்படையில், இந்த 4 சட்டமன்ற உறுப்பினர்களுக்கும் சபாநாயகர் ஜேசிடி பிரபாகர் நோட்டீஸ் அனுப்பியுள்ளார். ஒரு வாரத்திற்குள் விளக்கம் அளிக்குமாறு அதில் கோரப்பட்டுள்ளது.
சென்னை தலைமைச் செயலகத்தில் செய்தியாளர்களைச் சந்தித்த சபாநாயகர் ஜேசிடி பிரபாகர், தமிழக சட்டப்பேரவை உறுப்பினர்களுக்கான சிறப்புப் புத்தாக்கப் பயிற்சி முகாம் ஜூன் 16 மற்றும் 17 ஆகிய தேதிகளில் சென்னை கலைவாணர் அரங்கத்தில் நடைபெறவுள்ளதாகத் தெரிவித்தார். தமிழக முதலமைச்சர் விஜய் இந்த நிகழ்வைத் தொடங்கி வைக்கிறார். சட்டமன்ற உறுப்பினர்கள் கடைபிடிக்க வேண்டிய முறையான நடைமுறைகள், அவை விதிகள் மற்றும் நெறிமுறைகள் குறித்துப் பேரவைச் செயலாளர்கள், அதிகாரிகள் மற்றும் சட்ட வல்லுநர்கள் பயிற்சி அளிக்கவுள்ளனர். கட்சிப் பாகுபாடின்றி அனைத்து உறுப்பினர்களும் கலந்துகொள்ள அழைப்பு விடுத்துள்ளார்.
மேலும், அதிமுகவின் புதிய கொறடா யார் என்பது தொடர்பாகத் தங்களுக்கு வந்துள்ள மனுக்கள் குறித்துத் தீவிர சட்ட ஆய்வுகள் நடைபெற்று வருவதாகவும், வரவிருக்கும் சட்டப்பேரவைக் கூட்டத்தொடர் தொடங்குவதற்கு முன்பாக இதுகுறித்த இறுதி முடிவு அறிவிக்கப்படும் என்றும் சபாநாயகர் குறிப்பிட்டார். பொதுமக்கள் அவையின் நிகழ்வுகளைத் தெரிந்துகொள்ளும் வகையில், சட்டப்பேரவை நடவடிக்கைகளை முழுமையாக நேரலை செய்வது குறித்தும் அரசு பரிசீலித்து வருவதாக அவர் தெரிவித்தார்.
சட்டப்பேரவையில் ஆளுங்கட்சி, எதிர்க்கட்சி என்ற பேதமின்றி அனைத்து உறுப்பினர்களின் நியாயமான கருத்துக்களுக்கும், கோரிக்கைகளுக்கும் மதிப்பளிப்பதாக சபாநாயகர் ஜேசிடி பிரபாகர் உறுதியளித்தார். மரபு சார்ந்த ஆளுநர் உரையின் அதிகாரப்பூர்வ நகல், சட்டமன்றக் கூட்டத்தொடர் தொடங்குவதற்கு முன்னதாக ஆளுநரிடம் ஒப்படைக்கப்படும் என்றும் அவர் தெரிவித்தார்.
