மானாமதுரை தொகுதி த.வெ.க எம்.எல்.ஏ. இளங்கோவன், தனது மகள் தேவமித்ராவை அரசுப் பள்ளியில் 6-ம் வகுப்பில் சேர்த்துள்ளார். திருப்புவனம் அரசு பெண்கள் மேல்நிலைப்பள்ளியில் நேற்று எம்.எல்.ஏ. தனது மனைவியுடன் சென்று மகளைப் பதிவு செய்தார். இந்தச் செயல் பலரிடமும் பாராட்டுக்களைப் பெற்று வருகிறது.
திருப்புவனம் அருகே அகரம் கிராமத்தைச் சேர்ந்த எம்.எல்.ஏ. இளங்கோவன், ஜெயலட்சுமி தம்பதியினரின் மகள் தேவமித்ரா, கடந்த ஆண்டு வரை அகரம் ஊராட்சி ஒன்றிய தொடக்கப்பள்ளியில் 5-ம் வகுப்பு வரை படித்தார். இந்நிலையில், 6-ம் வகுப்பில் சேர்க்கும் பொருட்டு, திருப்புவனம் அரசு பெண்கள் மேல்நிலைப்பள்ளிக்கு நேற்று எம்.எல்.ஏ. குடும்பத்துடன் சென்றனர்.
பள்ளியின் தலைமை ஆசிரியை இந்திராவிடம், தேவமித்ராவை 6-ம் வகுப்பில் எம்.எல்.ஏ. இளங்கோவன் சேர்த்துவிட்டார். மேலும், பள்ளியின் தேவைகள் மற்றும் குறைகள் குறித்தும் அவரிடம் கேட்டறிந்தார். பள்ளியின் தேவைகளை உடனடியாக நிறைவேற்றுவதாகவும் எம்.எல்.ஏ. உறுதியளித்துள்ளார்.
சட்டமன்ற உறுப்பினராக இருக்கும் இளங்கோவன், தனது சொந்த மகளை அரசுப் பள்ளியில் சேர்த்திருப்பது பலராலும் பாராட்டப்பட்டு வருகிறது. இது மற்றவர்களுக்கும் ஒரு முன்மாதிரியாக அமையும் என எதிர்பார்க்கப்படுகிறது.
