இலங்கையில் நடைபெற்று வரும் முத்தரப்பு ஒருநாள் கிரிக்கெட் தொடரில், பலம் வாய்ந்த இந்திய 'ஏ' அணியை 4 ரன்கள் வித்தியாசத்தில் வீழ்த்தி ஆப்கானிஸ்தான் 'ஏ' அணி திரில் வெற்றி பெற்றுள்ளது. இலங்கையின் தம்புள்ளா மைதானத்தில் நடைபெற்ற இந்தப் போட்டியில், மழையின் குறுக்கீடு காரணமாக ஆட்டம் 49 ஓவர்களாகக் குறைக்கப்பட்டது.
முதலில் பேட்டிங் செய்த இந்திய 'ஏ' அணி, வைபவ் சூரியவன்ஷி (44 ரன்கள்), பிரப்சிம்ரன் சிங் (84 ரன்கள்), கேப்டன் திலக் வர்மா (66 ரன்கள்), ருதுராஜ் கெய்க்வாட் (66 ரன்கள்) ஆகியோரின் சிறப்பான ஆட்டத்தால் 9 விக்கெட் இழப்பிற்கு 349 ரன்கள் என்ற இமாலய இலக்கை நிர்ணயித்தது. இறுதிக்கட்டத்தில் சூர்யான்ஷ் ஷெட்ஜ் அதிரடியாக 40 ரன்கள் சேர்த்தார். ஆப்கானிஸ்தான் தரப்பில் அப்துல்லா அகமத்ஸாய் 5 விக்கெட்டுகளைக் கைப்பற்றினார்.
பின்னர், மழை குறுக்கிட்டதால் ஆப்கானிஸ்தான் அணியின் இலக்கு டக்வொர்த் லூயிஸ் விதிப்படி 38 ஓவர்களில் 294 ரன்களாக மாற்றியமைக்கப்பட்டது. கடினமான இலக்கை நோக்கி விளையாடிய ஆப்கானிஸ்தான் அணிக்கு, கேப்டன் இம்ரான் (75 ரன்கள்) மற்றும் பஹிர் ஷா (51 ரன்கள்) ஆகியோர் சிறப்பான தொடக்கத்தை அளித்தனர். ஆப்கானிஸ்தான் அணி 25.5 ஓவர்களில் 2 விக்கெட் இழப்பிற்கு 177 ரன்கள் எடுத்திருந்தபோது மீண்டும் பலத்த மழை பெய்தது.
தொடர்ந்து மழை பெய்ததால் ஆட்டத்தை மீண்டும் தொடங்க முடியாத நிலை ஏற்பட்டது. இதனால், டக்வொர்த் லூயிஸ் விதியின்படி, அந்த ஓவர் முடிவில் ஆப்கானிஸ்தான் அணி நிர்ணயிக்கப்பட்ட இலக்கை விட 4 ரன்கள் அதிகமாக எடுத்திருந்தது. இதன் காரணமாக, ஆப்கானிஸ்தான் 'ஏ' அணி 4 ரன்கள் வித்தியாசத்தில் வெற்றி பெற்றதாக நடுவர்களால் அறிவிக்கப்பட்டது. நட்சத்திர வீரர்கள் அடங்கிய இந்திய 'ஏ' அணிக்கு இந்தத் தோல்வி பெரும் ஏமாற்றத்தை அளித்துள்ளது.
