கள்ளச்சாராயத்தை முற்றிலுமாக ஒழிக்கும் நடவடிக்கையின் ஒரு பகுதியாக, முதலமைச்சர் விஜய் உத்தரவின் பேரில் ஒரு சிறப்புப் படை அமைக்கப்பட்டுள்ளதாக அமைச்சர் ஆதவ் அர்ஜூனா தெரிவித்துள்ளார். இந்த சிறப்புப் படை, கள்ளச்சாராயம் தயாரித்தல் மற்றும் விற்பனை போன்ற சட்டவிரோத செயல்களை இரும்புக்கரம் கொண்டு அடக்கும் என்று அவர் உறுதியளித்தார்.

கல்வராயன் மலைப் பகுதியில் நடைபெற்ற முக்கிய ஆய்வு கூட்டத்தில் அமைச்சர் ஆதவ் அர்ஜூனா பேசுகையில், திருவண்ணாமலை, விழுப்புரம், கள்ளக்குறிச்சி மற்றும் கடலூர் உள்ளிட்ட வட மாவட்டங்களில் மதுப்பழக்கம் அதிகரித்து வருவது கவலை அளிப்பதாகக் குறிப்பிட்டார். போதை இல்லாத மாநிலமாக தமிழ்நாட்டை மாற்றுவதே முதலமைச்சரின் முதன்மையான நோக்கம் என்றும் அவர் தெரிவித்தார்.

இளைஞர்கள் மத்தியில் போதை கலாச்சாரத்தைத் தடுத்து, அவர்களை நல்வழிப்படுத்த அரசு தீவிரமாகச் செயல்பட்டு வருவதாகவும் அமைச்சர் கூறினார். இதன் ஒரு பகுதியாக, கல்வராயன் மலையில் 5 ஏக்கர் பரப்பளவில் நவீன விளையாட்டுப் பயிற்சி மைதானம் மற்றும் பயிற்சி பெறும் மாணவர்களுக்கான தங்கும் விடுதி அமைக்கப்படும் என்றும் அவர் அறிவித்தார்.

இளைஞர்கள் விளையாட்டில் அதிக ஆர்வம் காட்டத் தொடங்கினாலே போதைப்பொருள் பழக்கம் தானாகவே குறைந்துவிடும் என்று குறிப்பிட்ட அவர், விளையாட்டுத் துறை மூலமாக இளைஞர்களின் எதிர்காலத்தை மேம்படுத்த திட்டமிடப்பட்டுள்ளதாகத் தெரிவித்தார். இதற்கான பணிகளை விரைந்து முடித்து, அந்தப் பகுதி இளைஞர்களின் விளையாட்டுத் திறனை ஊக்குவிக்க முக்கியத்துவம் அளிக்கப்படும் என்றும் அவர் பேசினார்.