ஆப்கானிஸ்தானுக்கு எதிரான டெஸ்ட் போட்டியில் இந்திய அணிக்காக இளம் சுழற்பந்து வீச்சாளர் மானவ் சுதர் அறிமுகமாகியுள்ளார். பல ஆண்டுகால கடின உழைப்பு மற்றும் பயிற்சி இன்று பலனளித்துள்ளது. போட்டி தொடங்குவதற்கு முன், இந்திய அணியின் மூத்த சுழற்பந்து வீச்சாளர் குல்தீப் யாதவ், மானவ் சுதருக்கு டெஸ்ட் தொப்பியை வழங்கி கௌரவித்தார். இது அவரது கிரிக்கெட் வாழ்க்கையின் மிக முக்கிய மைல்கல்லாகும்.
23 வயதான மானவ் சுதர், இந்திய கிரிக்கெட்டின் எதிர்கால நம்பிக்கைக்குரிய சுழற்பந்து வீச்சு ஆல்ரவுண்டராக பார்க்கப்படுகிறார். இவர் ஒரு இடது கை ஆர்த்தடாக்ஸ் சுழற்பந்து வீச்சாளர் மட்டுமல்லாமல், கீழ் வரிசையில் அதிரடியாக ரன்களை குவிக்கக்கூடிய பேட்ஸ்மேனாகவும் உள்ளார். தற்போது ராஜஸ்தான் அணிக்காகவும், ஐபிஎல் தொடரில் குஜராத் டைட்டன்ஸ் அணிக்காகவும் விளையாடி வருகிறார். ராஜஸ்தானின் எல்லையோர நகரமான ஸ்ரீ கங்காநகரில் இருந்து தனது கிரிக்கெட் பயணத்தை தொடங்கிய இவர், தற்போது சர்வதேச கிரிக்கெட் அரங்கில் கால் பதித்துள்ளார். இந்திய சிவப்பு பந்து கிரிக்கெட்டின் முக்கிய சொத்தாக சுதர் கருதப்படுகிறார். ரவீந்திர ஜடேஜாவுக்கு ஓய்வு அளிக்கப்பட்ட நிலையில், அணியின் அடுத்தகட்ட சுழற்பந்து வீச்சு திறமைகளை கண்டறியும் ஒரு வாய்ப்பாக இந்த அறிமுகம் அமைந்துள்ளது.
கடந்த 2022-23 ரஞ்சிக் கோப்பை சீசனில் ராஜஸ்தான் அணிக்காக சிறப்பாக பந்துவீசி, 6 போட்டிகளில் 39 விக்கெட்டுகளை வீழ்த்தி அனைவரின் கவனத்தையும் ஈர்த்தார். இதுவரை 29 முதல் தர போட்டிகளில் விளையாடி 129 விக்கெட்டுகளையும், 945 ரன்களையும் குவித்துள்ளார். இந்தியா 'ஏ' அணிக்காக இவர் ஆற்றிய பங்களிப்பும் குறிப்பிடத்தக்கது. ஆஸ்திரேலியா 'ஏ' அணிக்கு எதிராக 107 ரன்களுக்கு 5 விக்கெட்டுகளை வீழ்த்தியது உட்பட, தொடர் முழுவதும் விக்கெட்டுகளைக் குவித்து அதிக விக்கெட் வீழ்த்திய வீரர்களில் ஒருவராக திகழ்ந்தார். மேலும், 2023 ACC எமர்ஜிங் டீம்ஸ் ஆசிய கோப்பை தொடரிலும் தனது திறமையை நிரூபித்தார். இந்த சிறப்பான ஆட்டத்திறன் அவரை இந்திய டெஸ்ட் அணிக்கு உயர்த்தியுள்ளது.
முல்லன்பூரில் டாஸ் வென்ற இந்திய கேப்டன் ஷுப்மன் கில், முதலில் பேட்டிங் செய்ய தீர்மானித்தார். இந்த டெஸ்ட் போட்டிக்கான இந்திய அணியில் கே.எல். ராகுல், ஜெய்ஸ்வால், சாய் சுதர்சன், ஷுப்மன் கில், ரிஷப் பண்ட், துருவ் ஜூரல், வாஷிங்டன் சுந்தர், மானவ் சுதர், குல்தீப் யாதவ், முகமது சிராஜ் மற்றும் பிரசித் கிருஷ்ணா ஆகியோர் இடம்பெற்றுள்ளனர். ஆப்கானிஸ்தான் அணியை ஹஷ்மத்துல்லா ஷாஹிதி வழிநடத்துகிறார்.
