நாடு முழுவதும் உள்ள மத்திய பல்கலைக்கழகங்களில் இளநிலை படிப்பில் சேர்வதற்கு ‘கியூட்’ நுழைவுத் தேர்வில் தேர்ச்சி பெறுவது அவசியமாக்கப்பட்டுள்ளது. இந்தத் தேர்வில் பெறும் மதிப்பெண்களின் அடிப்படையில் மாணவர்களுக்கு கல்லூரிகள் ஒதுக்கப்படுகின்றன. அதன்படி, 2026-ஆம் ஆண்டிற்கான ‘கியூட்’ தேர்வு மே 11 முதல் மே 31 வரை நடைபெறும் என முதலில் அறிவிக்கப்பட்டிருந்தது.
இந்நிலையில், மே 28 அன்று பக்ரீத் பண்டிகை வருவதால், தேர்வு தேதியை மாற்றியமைக்க வேண்டும் என பல்வேறு தரப்பிலிருந்து கோரிக்கைகள் எழுந்தன. இந்தக் கோரிக்கைகளை ஏற்று, தேசிய தேர்வு முகமை (என்.டி.ஏ.) இளநிலை ‘கியூட்’ நுழைவுத் தேர்வுக்கான மாற்றப்பட்ட புதிய தேதிகளை வெளியிட்டுள்ளது.
புதிய அட்டவணையின்படி, ‘கியூட்’ தேர்வுகள் மே 31, ஜூன் 6 மற்றும் ஜூன் 7 ஆகிய தேதிகளில் நடைபெறும் என அறிவிக்கப்பட்டுள்ளது. மே 31-ஆம் தேதி தேர்வில் பங்கேற்கும் மாணவர்களுக்கான ஹால் டிக்கெட்டுகள் ஏற்கனவே வெளியிடப்பட்டுவிட்டன.
இந்த ஹால் டிக்கெட்டுகளை cuet.nta.nic.in என்ற அதிகாரப்பூர்வ இணையதளத்தில் இருந்து பதிவிறக்கம் செய்துகொள்ளலாம் என என்.டி.ஏ. தெரிவித்துள்ளது. ஜூன் 6 மற்றும் 7-ஆம் தேதிகளுக்கான ஹால் டிக்கெட்டுகள் விரைவில் வெளியிடப்படும் என்றும் தெரிவிக்கப்பட்டுள்ளது.
