வைபவ் மற்றும் மீனாட்சி கோவிந்தராஜன் முக்கிய கதாபாத்திரங்களில் நடிக்கும் ‘தத் த்வம் அஸி’ திரைப்படம், மலையாளத்தில் வரவேற்பைப் பெற்ற ‘மாளிபுரப்புரம்’ படத்தை இயக்கிய விஷ்ணு சசி சங்கர் இயக்கத்தில் உருவாகிறது. அரவிந்த் ஆகாஷ், ஆடுகளம் நரேன் உள்ளிட்ட பலரும் முக்கிய கதாபாத்திரங்களில் நடிக்கின்றனர்.
ஜேகே சரவணன் மற்றும் ஜேகே சதீஷ் தயாரிக்கும் இந்தப் படத்திற்கு பிரேம் ஜி அமரன் இசையமைக்கிறார். யுவன் செல்வா ஒளிப்பதிவு செய்யும் படத்தின் படப்பிடிப்பு சென்னையில் பூஜையுடன் தொடங்கியது. இயக்குநர் வெங்கட் பிரபு கிளாப் அடிக்க, பொன்ராம் கேமராவை ஆன் செய்து படக்குழுவினரை வாழ்த்தினார்.
'பக்தி, நம்பிக்கை, ஆன்மீக உணர்வுகளை மையமாகக் கொண்டு, அதனுடன் அதிரடி ஆக்ஷன் மற்றும் உணர்ச்சி கலந்த பொழுதுபோக்கு அம்சங்களுடன் இப்படம் உருவாகிறது. அனைத்து தரப்பு ரசிகர்களையும் கவரும் வகையில் படத்தின் திரைக்கதை அமைக்கப்பட்டுள்ளது' என படக்குழு தெரிவித்துள்ளது.
இந்த ஆண்டு ஐயப்ப மண்டல காலத்தை முன்னிட்டு படத்தை வெளியிட படக்குழு திட்டமிட்டுள்ளது. ஆன்மிகம், அதிரடி, உணர்ச்சி என பல அம்சங்கள் நிறைந்த இந்தப் படம் ரசிகர்களிடையே பெரும் எதிர்பார்ப்பை ஏற்படுத்தியுள்ளது.
