சமீபத்தில் வெளியான 'கருப்பு' திரைப்படம் பெரும் வரவேற்பைப் பெற்று வசூல் சாதனை படைத்து வரும் நிலையில், அதன் வெற்றி குறித்து இயக்குநர் ஆர்.ஜே.பாலாஜி விளக்கமளித்துள்ளார். சூர்யா, த்ரிஷா நடிப்பில் வெளியான இப்படம், தமிழகத்தில் மட்டும் ரூ.100 கோடி வசூலைக் கடந்து சாதனை படைத்துள்ளது.
'கருப்பு' திரைப்படம் குடும்பங்கள் கொண்டாடும் வகையில் உருவாக்கப்பட்ட ஒன்று என்றும், விமர்சகர்கள் அல்லது இணையத்தில் கருத்து தெரிவிப்பவர்களுக்காக இப்படம் எடுக்கப்படவில்லை என்றும் ஆர்.ஜே.பாலாஜி திட்டவட்டமாகத் தெரிவித்துள்ளார். பட வெளியீட்டிற்கு முன்பே இதுகுறித்து தெளிவுபடுத்தியதாகவும் அவர் குறிப்பிட்டுள்ளார்.
மேலும், திரையரங்குகளில் படக்குழு ஆட்களை அனுப்பி கொண்டாடுவதாக எழுந்த விமர்சனங்களுக்குப் பதிலளித்த ஆர்.ஜே.பாலாஜி, 'அப்படிச் செய்யத் தேவையான பெரிய தொகையை நாங்கள் செலவிடவில்லை. மக்கள் இப்படத்தை தங்களுக்குச் சொந்தமான ஒன்றாகக் கொண்டாடி மகிழ்வதே எங்களுக்குப் பெரும் மகிழ்ச்சி' எனத் தெரிவித்தார்.
'கருப்பு' பட வெற்றிக் கொண்டாட்டத்தின் ஒரு பகுதியாக திரையரங்குகளுக்குச் சென்ற ஆர்.ஜே.பாலாஜி, அங்கு செய்தியாளர்களைச் சந்தித்தார். அப்போது, 'பெட்ரோல், டீசல் விலை உயர்வால் யாருக்கெல்லாம் பலன்?' என்ற கேள்விக்கு மோடி பதிலளிக்க வேண்டும் என்றும் அவர் மறைமுகமாக விமர்சித்தார்.
