இந்திய தேர்தல் ஆணையத்தின் செயல்பாடுகள் குறித்து எழுந்த புகார்களுக்கு விளக்கம் அளித்துள்ள தேர்தல் ஆணையம், அனைத்து முக்கிய முடிவுகளும் ஒருமனதாகவே எடுக்கப்பட்டதாக தெரிவித்துள்ளது.
கடந்த 10 மாதங்களில் தேர்தல் ஆணையத்தின் இரண்டு ஆணையர்களான சுக்பீர் சிங் சந்து மற்றும் விவேக் ஜோஷி ஆகியோர், ஆணையத்தின் நடவடிக்கைகள் தொடர்பாக 14க்கும் மேற்பட்ட முறை அதிகாரப்பூர்வமாக ஆட்சேபனை தெரிவித்ததாக இந்தியன் எக்ஸ்பிரஸ் நாளிதழ் செய்தி வெளியிட்டிருந்தது. புதிய வாக்காளர்களைச் சேர்ப்பது, வாக்காளர் பெயர்களை நீக்குவது, வாக்காளர் பட்டியல் மென்பொருளின் செயல்பாடு போன்ற முக்கிய விஷயங்களில் இந்த ஆட்சேபனைகள் எழுந்துள்ளதாக அந்தச் செய்தி குறிப்பிட்டது.
இந்த செய்தியைத் தொடர்ந்து எதிர்க்கட்சிகள் கண்டனம் தெரிவித்த நிலையில், இந்திய தேர்தல் ஆணையம் தனது தரப்பு விளக்கத்தை அளித்துள்ளது. இந்திய அரசியலமைப்பின் 324வது பிரிவின் கீழ் உள்ள சட்டப்பூர்வ விதிகள் மற்றும் நடைமுறைகளைப் பின்பற்றியே ஆணையம் செயல்படுவதாக அது தெளிவுபடுத்தியுள்ளது.
முடிவெடுக்கும் செயல்முறையின் போது, ஆணைய உறுப்பினர்கள் மட்டுமின்றி, ஆணையத்தின் ஒவ்வொரு அதிகாரியும் தங்களது பரிந்துரைகளையும் கருத்து வேறுபாடுகளையும் வெளிப்படுத்த அதிகாரம் உண்டு என்றும், இது இயல்பான ஒன்று என்றும் தேர்தல் ஆணையம் கூறியுள்ளது.
எஸ்.ஐ.ஆர். உள்ளிட்ட 40 புதிய திட்டங்கள் மற்றும் சீர்திருத்தங்கள் அனைத்தும் ஒருமனதான முடிவுகளின் அடிப்படையிலேயே எடுக்கப்பட்டுள்ளன என்பதை ஆணையம் வலியுறுத்தியுள்ளது.
ஜனநாயகத்தைப் பாதுகாக்கவும், அரசியலமைப்பு கடமைகளை நேர்மையுடன் நிறைவேற்றவும் இந்திய தேர்தல் ஆணையம் உறுதியாக இருப்பதாகவும் தனது விளக்கத்தில் தெரிவித்துள்ளது.
தேர்தல் ஆணையர்களின் கருத்து வேறுபாடுகள் குறித்த புகார்களுக்கு மத்தியில், அனைத்து முடிவுகளும் ஒருமித்த கருத்துடன் எடுக்கப்பட்டதாக தேர்தல் ஆணையம் அளித்துள்ள இந்த விளக்கம் முக்கியத்துவம் பெறுகிறது. வாக்காளர் பட்டியல் தொடர்பான முக்கிய விவகாரங்களில் எழுந்துள்ள ஆட்சேபனைகள் குறித்து ஆணையம் மேலும் தெளிவுபடுத்தியுள்ளது.
