உத்தரப்பிரதேச மாநிலம் பலராம்பூரில் உள்ள டிவைன் பப்ளிக் பள்ளியில், இரண்டாம் வகுப்பு மாணவி ஒருவர் வகுப்பறையில் திடீரென மயங்கி விழுந்து உயிரிழந்த சம்பவம் பெரும் சோகத்தை ஏற்படுத்தியுள்ளது. பள்ளிக்கு அருகே சென்ற விநாயகர் சிலை கரைப்பு ஊர்வலத்தில் இருந்து ஒலித்த உரத்த டிஜே இசையே மாணவியின் இந்த நிலைமைக்கு காரணமாக இருக்கலாம் என பள்ளி நிர்வாகம் குற்றம் சாட்டியுள்ளது. இருப்பினும், பிரேதப் பரிசோதனை அறிக்கை வந்த பின்னரே மரணத்திற்கான சரியான காரணத்தை உறுதிப்படுத்த முடியும் என மருத்துவர்கள் தெரிவித்துள்ளனர்.
உயிரிழந்த மாணவி வைஷ்ணவி திவாரி, சோனு திவாரியின் மகள் ஆவார். இவர் சித்தார்த்நகரில் உள்ள குல்ஹரியா கிராமத்தைச் சேர்ந்தவர் என்றும், பலராம்பூரில் தனது குடும்பத்துடன் வாடகை வீட்டில் வசித்து வந்ததாகவும் கூறப்படுகிறது. வைஷ்ணவி அந்தத் தம்பதியரின் ஒரே மகள் என்பது குறிப்பிடத்தக்கது.
பள்ளியில் இருந்த சிசிடிவி காட்சிகளின்படி, காலை சுமார் 10:58 மணியளவில் வைஷ்ணவி தனது வகுப்பறையில் சக மாணவர்களுடன் சாதாரணமாகப் படித்துக் கொண்டிருந்தார். அப்போது, டிஜே இசையுடன் கூடிய விநாயகர் சிலை கரைப்பு ஊர்வலம் பள்ளியைக் கடந்து சென்றது. அந்த நேரத்தில், வைஷ்ணவி மற்ற மாணவர்களுடன் சிரித்துப் பேசிக்கொண்டிருந்த காட்சிகள் பதிவாகியுள்ளன. அவர் தனது இருக்கையிலிருந்து எழுந்து மீண்டும் அமர்ந்தார்.
பின்னர், திடீரென தனது மேஜையிலிருந்து சரிந்து கீழே விழும் காட்சிகளும் சிசிடிவி கேமராவில் பதிவாகியுள்ளன. இதைக்கண்ட ஆசிரியர்கள் உடனடியாக வைஷ்ணவியை மீட்டு, அருகிலுள்ள மருத்துவமனைக்கு அழைத்துச் சென்றனர். ஆனால், துரதிர்ஷ்டவசமாக அவர் வகுப்பறையிலேயே இறந்துவிட்டதாக மருத்துவர்கள் தெரிவித்தனர்.
மாணவியின் மரணத்திற்கும், டி.ஜே. ஒலிக்கும் தொடர்பு இருப்பதாக சமூக ஊடகங்கள் மூலம் காவல்துறைக்குத் தகவல் கிடைத்ததாக நகர காவல் ஆய்வாளர் அபிஷேக் சிங் தெரிவித்தார். இது குறித்து காவல் நிலையத்தில் எந்தப் புகாரும் பதிவு செய்யப்படவில்லை என்றும், மாணவியின் இறுதிச் சடங்குகள் ஏற்கனவே நடத்தப்பட்டுவிட்டதாகவும் அவர் கூறினார்.
இந்த துயரச் சம்பவம், பொது இடங்களில் நடைபெறும் நிகழ்ச்சிகளின்போது ஒலி அளவு கட்டுப்பாடுகள் குறித்த விவாதங்களை எழுப்பியுள்ளது. குறிப்பாக, பள்ளிகள் மற்றும் கல்வி நிறுவனங்களுக்கு அருகே இதுபோன்ற நிகழ்ச்சிகள் நடத்தப்படும்போது கூடுதல் கவனம் தேவை என்பதை இந்த சம்பவம் உணர்த்துகிறது.
வைஷ்ணவியின் திடீர் மரணம் அவரது குடும்பத்தினரையும், சக மாணவர்களையும் மிகுந்த துயரத்தில் ஆழ்த்தியுள்ளது. பிரேதப் பரிசோதனை அறிக்கைக்காக அனைவரும் காத்திருக்கின்றனர். இந்தச் சம்பவம் உத்தரப்பிரதேச மாநிலத்தில் பெரும் அதிர்வலைகளை ஏற்படுத்தியுள்ளது.
