தமிழகத்தில் அவசர மருத்துவ உதவிக்கு 108 ஆம்புலன்ஸ் சேவையை இனி வாட்ஸ்அப் மூலமாகவும் முன்பதிவு செய்யலாம். பொதுமக்கள் மிக எளிமையாக இந்தச் சேவையைப் பயன்படுத்திக் கொள்ளும் வகையில் புதிய வசதி அறிமுகப்படுத்தப்பட்டுள்ளது.
முதலில், 94450 30725 என்ற அதிகாரப்பூர்வ வாட்ஸ்அப் எண்ணை உங்கள் மொபைலில் சேமித்துக் கொள்ள வேண்டும். அவசரத் தேவை ஏற்படும்போது, இந்த எண்ணிற்கு வாட்ஸ்அப்பில் 'Hi' என்று ஒரு குறுஞ்செய்தி அனுப்பினால், உடனடியாக ஒரு பதில் செய்தி வரும். அதில் 'புக் ஆம்புலென்ஸ்’ (Book Ambulance) என்பதைத் தேர்வு செய்ய வேண்டும்.
தொடர்ந்து, உங்கள் போனில் உள்ள 'செண்ட் லொகேசன்’ (Send Location) வசதி மூலம் உங்கள் தற்போதைய இடத்தை (Live Location) பகிர வேண்டும். உங்கள் கோரிக்கை கட்டுப்பாட்டு அறைக்குச் சென்றதும், உடனடியாக அருகிலுள்ள ஆம்புலன்ஸ் உங்களுக்கு அனுப்பி வைக்கப்படும். இந்த வசதியின் மூலம் ஆம்புலன்ஸ் வரும் வழித்தடம், ஓட்டுநரின் பெயர் மற்றும் தொடர்பு எண் ஆகியவற்றை உங்கள் மொபைலிலேயே நேரடியாகத் தெரிந்து கொள்ளலாம்.
மேலும், ஆம்புலன்ஸ் உங்களை வந்து சேர எவ்வளவு நேரம் ஆகும் என்பதையும் உடனுக்குடன் அறிய முடியும். கிராமப்புறங்கள் மற்றும் மலைப் பகுதிகளில் சரியான முகவரியைக் கண்டறிவதில் ஏற்படும் தாமதத்தை இந்தத் தொழில்நுட்பம் பெருமளவு குறைக்கும் என எதிர்பார்க்கப்படுகிறது.
