இயக்குநர் கே. பாக்யராஜின் மறைவுக்கு கவிஞர் வைரமுத்து தனது ஆழ்ந்த இரங்கலைத் தெரிவித்துள்ளார். பாரதிராஜாவின் மறைவுச் செய்தி கேட்டு மனம் வருந்திக் கொண்டிருக்கும் வேளையில், பாக்யராஜின் திடீர் மறைவு மேலும் அதிர்ச்சியை ஏற்படுத்தியுள்ளதாக அவர் குறிப்பிட்டுள்ளார்.
வைரமுத்து தனது எக்ஸ் (முன்னர் ட்விட்டர்) தளத்தில் வெளியிட்ட பதிவில், 'பதினேழே நாட்களில் இன்னோர் இடியா? பாரதிராஜாவைப் புதைத்த மண்ணின் ஈரம் இன்னும் காயவில்லை; அதற்குள் பாக்யராஜுக்குத் தீ மூட்டுவதா? என்ன கொடுமை இது!' என்று வேதனையுடன் குறிப்பிட்டுள்ளார்.
பாக்யராஜ் ஒரு ஈடு இணையற்ற கலைஞர் என்றும், அவிழ்க்க முடியாத முடிச்சுகளைத் திரைக்கதையில் இட்டு, அதைத் தானே அவிழ்க்கத் தெரிந்தவர் என்றும் வைரமுத்து புகழாரம் சூட்டியுள்ளார். அவரது உருவம், குரல் என அனைத்திலும் குறைகள் இருப்பதாகக் கருதப்பட்டாலும், அனைத்திலும் அவர் வென்றதாகக் குறிப்பிட்டுள்ளார். நகைச்சுவைக்கென்று தனித்தடம் உருவாக்காமல், கண்ணின் இமை போல திரைக்கதையில் நகைச்சுவையை அழகாக இழைத்து விடுவார் என்றும் அவர் பாராட்டியுள்ளார்.
80களில் தமிழ் சினிமாவை நோக்கி வந்த ஒவ்வொரு கிராமத்து இளைஞனுக்கும் பாக்யராஜ் நம்பிக்கை நட்சத்திரமாகத் திகழ்ந்தார் என்றும், எம்.ஜி.ஆர் அவரைத் தன் வாரிசு என்று அழைத்ததையும் வைரமுத்து நினைவு கூர்ந்துள்ளார். பாக்யராஜின் எதிர்பாராத மறைவு கலையுலகை அதிர வைத்துள்ளது என்றும், அவர் இன்னும் வாழ்ந்திருக்க வேண்டிய கலைஞர் என்றும், பாதியிலேயே பயணத்தை முடித்துவிட்டதாகக் குறிப்பிட்டு, அவரது ஆன்மா சாந்தியடைய ஆழ்ந்த இரங்கலைத் தெரிவித்துள்ளார்.
