இந்திய கிரிக்கெட் அணியின் முன்னாள் வீரரும், தற்போது பெங்களூருவில் உள்ள பிசிசிஐ சிறப்பு மையத்தின் தலைவருமான விவிஎஸ் லட்சுமணுக்கு, இந்திய கிரிக்கெட் கட்டுப்பாட்டு வாரியத்தில் (பிசிசிஐ) ஒரு முக்கியப் பொறுப்பு வழங்கப்பட உள்ளதாகத் தகவல்கள் தெரிவிக்கின்றன. வரும் செப்டம்பர் மாதம் நடைபெறவுள்ள சில முக்கிய நிர்வாக மாற்றங்களின்போது, லட்சுமணை கிரிக்கெட் இயக்குநர் ஆக நியமிக்க பிசிசிஐ அதிகாரிகள் பரிசீலித்து வருவதாகக் கூறப்படுகிறது.
தற்போது பெங்களூருவில் உள்ள சிறப்பு மையத்தில் இளம் வீரர்களின் மேம்பாடு மற்றும் பயிற்சித் திட்டங்களைக் கண்காணித்து வரும் விவிஎஸ் லட்சுமணுக்கு, கிரிக்கெட் இயக்குநர் பதவி வழங்கப்பட்டால் அவரது பொறுப்புகள் மேலும் விரிவடையும். இந்தப் புதிய பொறுப்பின் கீழ், மூத்த இந்திய அணி, தேர்வு குழு, பயிற்சியாளர்கள் மற்றும் சிறப்பு மையம் ஆகியவற்றுக்கு இடையே ஒரு ஒருங்கிணைப்பாளராக அவர் செயல்படுவார். திறமையான இளம் வீரர்களைக் கண்டறிந்து, அவர்களுக்கு உயர்தரப் பயிற்சித் திட்டங்களை வகுத்து செயல்படுத்துவது போன்ற முக்கியப் பணிகளையும் அவர் மேற்கொள்வார்.
இந்திய கிரிக்கெட் நிர்வாகத்தில் வரவிருக்கும் செப்டம்பர் மாதம் மிகவும் முக்கியத்துவம் வாய்ந்ததாகக் கருதப்படுகிறது. தற்போதைய தலைமைத் தேர்வு குழு தலைவர் அஜித் அகர்கரின் பதவிக்காலம் செப்டம்பருடன் நிறைவடைகிறது. இருப்பினும், அவரது பதவிக்காலத்தை 2027 ஜூன் மாதம் வரை நீட்டிக்க பிசிசிஐ திட்டமிட்டுள்ளதாகவும் செய்திகள் தெரிவிக்கின்றன. குறிப்பாக, 2027 ஒருநாள் உலகக் கோப்பைக்கு முன்னதாக கிரிக்கெட் கட்டமைப்பை மேலும் வலுப்படுத்தும் நோக்கில் பிசிசிஐ நிர்வாகம் பல மாற்றங்களைச் செய்யத் திட்டமிட்டுள்ளது.
விவிஎஸ் லட்சுமண் இதற்கு முன்பும் இந்திய சீனியர் அணியின் தற்காலிக தலைமைப் பயிற்சியாளராகப் பலமுறை பணியாற்றிய அனுபவம் கொண்டவர். சமீபத்தில், தலைமைப் பயிற்சியாளர் ராகுல் டிராவிட் மற்றும் பிற பயிற்சியாளர்களுக்கு ஓய்வு அளிக்கப்பட்டபோது, ஜிம்பாப்வேக்கு எதிரான டி20 தொடரில் இளம் இந்திய அணியை வழிநடத்தி, 3-0 என்ற கணக்கில் வெற்றியைப் பெற்றுக்கொடுத்தார். இந்தச் செயல் அவரது தலைமைப் பண்பை வெளிப்படுத்தியது.
கடந்த 2024 ஆம் ஆண்டு, ராகுல் டிராவிட்டிற்குப் பிறகு இந்திய அணியின் தலைமைப் பயிற்சியாளராகும் வாய்ப்பை விவிஎஸ் லட்சுமண் மறுத்து, சிறப்பு மையத்தின் தலைவராகவே தொடர விருப்பம் தெரிவித்திருந்தார் என்பது குறிப்பிடத்தக்கது. இந்தப் பின்னணியில், அவர் கிரிக்கெட் இயக்குநர் ஆக நியமிக்கப்படுவது இந்திய கிரிக்கெட்டின் எதிர்கால வளர்ச்சிக்கு ஒரு முக்கியப் படியாக அமையும் என எதிர்பார்க்கப்படுகிறது.
விவிஎஸ் லட்சுமணை கிரிக்கெட் இயக்குனராக நியமிப்பது குறித்து பிசிசிஐ இதுவரை அதிகாரப்பூர்வ அறிவிப்பு எதையும் வெளியிடவில்லை. எனினும், வரவிருக்கும் செப்டம்பர் மாதத்தில் இது குறித்த இறுதி முடிவு எடுக்கப்படும் என்றும், அது தொடர்பான அறிவிப்பு வெளியாகும் என்றும் எதிர்பார்க்கப்படுகிறது. இந்த நியமனம் இந்திய கிரிக்கெட்டில் ஒரு புதிய அத்தியாயத்தைத் தொடங்கும் என எதிர்பார்க்கப்படுகிறது.
