இந்திய கிரிக்கெட் அணியின் அடுத்தடுத்த சர்வதேச தொடர்களை முன்னிட்டு, இந்திய அணியின் தற்காலிக தலைமை பயிற்சியாளராக விவிஎஸ் லட்சுமண் நியமிக்கப்பட்டுள்ளார். இதுகுறித்து பிசிசிஐ-யின் தேசிய கிரிக்கெட் அகாடமியின் தலைவர் விவிஎஸ் லட்சுமண், ஜிம்பாப்வே டி20 தொடர் மற்றும் ஆசிய விளையாட்டுப் போட்டிகளில் விளையாடும் இந்திய அணிக்கு பயிற்சியாளராகச் செயல்படுவார் என்று தகவல் வெளியாகி உள்ளது.
தற்போதைய தலைமை பயிற்சியாளர் கௌதம் கம்பீர் மற்றும் அவரது குழுவினருக்கு ஓய்வளிக்கவே இந்த முடிவு எடுக்கப்பட்டுள்ளது. இங்கிலாந்துக்கு எதிரான ஒருநாள் தொடர் முடிந்தவுடன் இந்த மாற்றம் நிகழும். ஆசிய விளையாட்டுப் போட்டிகள் முடிந்த உடன் மீண்டும் கம்பீர் தலைமையிலான பயிற்சியாளர்கள் குழுவே இந்திய அணியை வழிநடத்தும்.
விவிஎஸ் லட்சுமணுடன் பேட்டிங் பயிற்சியாளராக ஹிருஷிகேஷ் கனித்கரும், பந்துவீச்சு பயிற்சியாளராக சுனில் ஜோஷியும் செயல்படவுள்ளனர். இங்கிலாந்து தொடர் முடிந்த அடுத்த 4 நாட்களில், அதாவது ஜூலை 23 முதல் ஜிம்பாப்வேயில் 3 போட்டிகள் கொண்ட டி20 தொடர் தொடங்கவுள்ளது. இவ்வளவு குறுகிய காலத்தில் அடுத்த தொடர் தொடங்குவதால், கம்பீரின் குழுவிற்கு ஓய்வளிக்கப்பட்டு, லட்சுமணின் குழுவிடம் பொறுப்பு ஒப்படைக்கப்பட்டுள்ளது.
தற்போது இங்கிலாந்து சுற்றுப்பயணத்தில் உள்ள இந்திய அணி, 5 போட்டிகள் கொண்ட டி20 தொடரைத் தொடர்ந்து 3 போட்டிகள் கொண்ட ஒருநாள் தொடரில் ஜூலை 14, 16 மற்றும் 19 ஆகிய தேதிகளில் விளையாடவுள்ளது. இந்த தொடர்கள் முடிந்த பிறகு, ஜிம்பாப்வே தொடருக்கான இந்திய அணிக்கு லட்சுமண் தலைமை தாங்குவார்.
இதேபோல், வரும் செப்டம்பர் மற்றும் அக்டோபர் மாதங்களிலும் இந்திய அணிக்கு நெருக்கடியான அட்டவணை காத்துள்ளது. செப்டம்பர் 13 முதல் 19 வரை ஆப்கானிஸ்தானுக்கு எதிராக 3 போட்டிகள் கொண்ட டி20 தொடர் நடைபெறவுள்ளது. அதே நேரத்தில், செப்டம்பர் 19 முதல் அக்டோபர் 3 வரை ஆசிய விளையாட்டுப் போட்டிகளும் நடைபெறவுள்ளன.
இந்த ஆசிய விளையாட்டுப் போட்டிக்கு லட்சுமண் பயிற்சியாளராகச் செயல்படுவார். அதே நேரத்தில், செப்டம்பர் 27 முதல் அக்டோபர் 17 வரை வெஸ்ட் இண்டீஸுக்கு எதிராக நடைபெறவுள்ள 3 ஒருநாள் மற்றும் 5 டி20 போட்டிகள் கொண்ட வெள்ளைப்பந்து தொடருக்கு கௌதம் கம்பீர் பயிற்சியாளராகச் செயல்படுவார்.
விவிஎஸ் லட்சுமண் இந்திய அணிக்கு தற்காலிக பயிற்சியாளராகச் செயல்படுவது இது முதல் முறையல்ல. இதற்கு முன்பு 2024-ல் சுப்மன் கில் தலைமையில் ஜிம்பாப்வே சென்ற இந்திய அணிக்கும், 2023 ஹாங்சோ ஆசிய விளையாட்டுப் போட்டிகளிலும் லட்சுமண் பயிற்சியாளராகப் பொறுப்பேற்று அணியை வழிநடத்தியுள்ளார் என்பது குறிப்பிடத்தக்கது. கம்பீர் பயிற்சியின் கீழ் 2026 டி20 உலகக்கோப்பையை வென்ற இந்திய அணி, அடுத்து அயர்லாந்து மற்றும் இங்கிலாந்து தொடர்களில் தொடர்ந்து தோல்விகளை சந்தித்து வந்துள்ளது.
