இந்திய கிரிக்கெட் அணியின் நட்சத்திர வீரரும், முன்னாள் கேப்டனுமான விராட் கோலி தற்போது தனது கிரிக்கெட் வாழ்க்கையின் கடைசி கட்டத்தை நெருங்கி வருகிறார். அடுத்த உலகக் கோப்பை தொடரில் அவர் விளையாடும்போது அவருக்கு வயது 39 ஆக இருக்கும். இந்த சூழலில், விராட் கோலி மற்றும் ரோகித் சர்மா போன்ற மூத்த வீரர்களை அணியிலிருந்து நீக்க வேண்டும் என்ற கருத்துக்கள் அவ்வப்போது ரசிகர்களிடையே எழுந்து வருகின்றன. எனினும், இருவரும் நல்ல உடல் தகுதியுடன் இருக்கும் வரை இந்திய அணிக்காக விளையாடுவார்கள் என பிசிசிஐ ஏற்கனவே அறிவித்துள்ளது.
சமீபத்தில் இங்கிலாந்துக்கு எதிரான முதல் டி20 போட்டியில் விராட் கோலி வெறும் 5 ரன்களில் ஆட்டமிழந்தார். அப்போது அவர் மீது மீண்டும் விமர்சனங்கள் எழுந்தன. ஆனால், அடுத்த இரண்டு டி20 போட்டிகளிலும் அவர் 65 மற்றும் 74 ரன்கள் என அதிரடியாக விளையாடி தனது ஃபார்மை நிரூபித்தார்.
இந்த நிலையில், ஆஸ்திரேலிய கிரிக்கெட் ஜாம்பவானும், வேகப்பந்து வீச்சாளருமான பிரெட் லீ, விராட் கோலிக்கு ஆதரவாக கருத்து தெரிவித்துள்ளார். தனது கிரிக்கெட் வாழ்க்கையின் கடைசி கட்டத்தில் இருக்கும் விராட் கோலி போன்ற ஒரு வீரருக்கு பந்து வீசிய அனுபவம் குறித்து அவர் மனம் திறந்து பேசியுள்ளார்.
'அவருடைய கண்களைப் பார்க்கும்போது, அவர் உங்களை நேராகப் பார்ப்பார். அது ஆட்டம் ஆரம்பம், என்னை உன்னால் அவுட் செய்ய முடியாது என்று சவால் விடுவது போல் இருக்கும். அவருக்கு எதிராக விளையாடிய போது நான் அதை நேரில் கண்டுள்ளேன். அவர் இப்போதும் அதே போன்ற ஒரு புலி தான். தான் சாதித்ததை நினைத்து அவர் நிச்சயம் பெருமைப்படுவார். மக்கள் என்ன வேண்டுமானாலும் நினைத்துக் கொள்ளட்டும்,' என்று பிரெட் லீ கூறினார்.
மேலும் பேசிய பிரெட் லீ, 'ஒரு போட்டியில் அவர் ரன் அடிக்கவில்லை என்றால், அவரது ஆட்டம் முடிந்துவிட்டது என்று சொல்வதெல்லாம் வெறும் குப்பை. அவரது சாதனைகளைப் பாருங்கள். அவரது சாதனை மிகவும் அபாரமானது,' என விராட் கோலியை வெகுவாகப் பாராட்டினார். விராட் கோலி, சர்வதேச கிரிக்கெட்டில் விளையாடிய காலத்தில், பிரெட் லீ தனது கிரிக்கெட் வாழ்க்கையின் இறுதி கட்டத்தில் இருந்தார். இதனால் இருவரும் மிகக் குறைந்த அளவிலேயே இணைந்து விளையாடியுள்ளனர். புள்ளிவிவரங்களின்படி, பிரெட் லீ இதுவரை விராட் கோலியை ஒருமுறை கூட ஆட்டமிழக்கச் செய்ததில்லை என்பது குறிப்பிடத்தக்கது.
