தமிழக முதல்வர் ஜோசப் விஜய், தமிழகத்தின் சாதனையாளர்களுக்கு பத்ம விருதுகள் வழங்கப்பட்டது குறித்தும், சோழர்களின் வரலாற்றுச் சின்னமான 'ஆனைமங்கல செப்பேடுகள்' தாயகம் திரும்பியது குறித்தும் வாழ்த்து தெரிவிக்காதது குறித்து தமிழக பாஜக தலைவர் நயினார் நாகேந்திரன் கடும் விமர்சனம் செய்துள்ளார். இது குறித்து அவர் தனது எக்ஸ் தளத்தில் பதிவிட்டதாவது:
'தமிழகத்தின் முதல்வரா அல்லது தமிழினத்தின் எதிரியா ஜோசப் விஜய்? மத்திய அரசு அறிவித்த பத்ம விருதுகளில் 7 பேருக்கு விருதுகள் வழங்கப்பட்டு 24 மணிநேரம் ஆகிவிட்டது. சாதாரண குடும்பங்களில் பிறந்து, தங்களது திறமையால் உலகை திரும்பிப் பார்க்க வைத்த தமிழர்களுக்கு விருதுகள் கிடைத்துள்ளன. அவர்களின் இந்த வெற்றி கண்டு நீங்கள் ஏன் மகிழவில்லை? சாமானியர்களுக்கு கிடைத்த இந்த உயரிய விருதுகள் உங்களுக்கு பிடிக்கவில்லையா? முதல்வராக இல்லாவிட்டாலும், ஒரு சாதாரண தமிழனாக நீங்கள் கொண்டாட வேண்டிய தருணம் இது. ஆனால், உங்கள் மௌனம் ஏன்?' என்று கேள்வி எழுப்பியுள்ளார்.
மேலும், 'சோழ மன்னர்களின் வரலாற்று அடையாளமான 'ஆனைமங்கல செப்பேடுகள்' தாயகம் திரும்பியதற்கும், தமிழகத்தைச் சேர்ந்தவர்களுக்கு பத்ம விருதுகள் கிடைத்ததற்கும் நீங்கள் வாழ்த்துக் கூறவில்லை. உங்களை தோள் கொடுத்து தூக்கிவிட்ட தமிழகத்திற்கு நீங்கள் காட்டும் நன்றிக்கடன் இதுதானா ஜோசப் விஜய்? இப்படியொரு ஆணவ முதல்வரை தமிழக வரலாறு கண்டதில்லை' என்றும் அவர் கடுமையாக சாடியுள்ளார்.
முதல்வர் விஜய், தமிழகத்தின் நலன் சார்ந்த விஷயங்களில் மௌனம் சாதிப்பதாக நயினார் நாகேந்திரன் குற்றம் சாட்டியுள்ளார். இது தமிழக அரசியலில் பெரும் விவாதத்தை ஏற்படுத்தியுள்ளது. விஜய்யின் அரசியல் நகர்வுகள் மற்றும் அவரது நிலைப்பாடுகள் குறித்து பல்வேறு கேள்விகள் எழுப்பப்பட்டுள்ளன.
