தொழிலதிபர் ஜெம் கிரானைட்ஸ் வீரமணி மீது சுமத்தப்பட்டுள்ள சிறுமிகள் பாலியல் வன்கொடுமை தொடர்பான குற்றச்சாட்டுகள் மற்றும் விசாரணையில் வெளிவரும் அதிர்ச்சியூட்டும் தகவல்கள் மிகுந்த வேதனையை அளிப்பதாக வானதி சீனிவாசன் தெரிவித்துள்ளார். இதுகுறித்து அவர் வெளியிட்டுள்ள அறிக்கையில், கல்வி உதவித்தொகை வழங்குவதாகக் கூறி ஏழைச் சிறுமிகளை ஏமாற்றி பாலியல் துஷ்பிரயோகம் செய்ததாகக் கூறப்படும் இச்சம்பவங்களுக்கு கடுமையான தண்டனைகள் வழங்கப்பட வேண்டும் என வலியுறுத்தியுள்ளார். இந்த போக்சோ வழக்கை முடித்து வைக்க காவல்துறை ஏற்கெனவே முயன்றதாகவும், சிறப்பு நீதிமன்றத்தின் தலையீட்டிற்குப் பிறகே விசாரணை தீவிரமடைந்ததாகவும் கூறப்படும் தகவல்கள் பல கேள்விகளை எழுப்புவதாக அவர் சுட்டிக்காட்டியுள்ளார்.
இந்த வழக்கில் உண்மைகள் முழுமையாக வெளிவர வேண்டும் என்றும், குற்றம் சாட்டப்பட்டவர்கள் மட்டுமல்லாமல், குற்றங்கள் நடைபெற்ற காலத்தில் அவர்களுக்கு உதவியவர்கள், உண்மைகளை மறைக்க அல்லது விசாரணையைத் திசைதிருப்ப முயன்றவர்கள் என யாரேனும் இருந்தால், அவர்களும் பாரபட்சமின்றி விசாரிக்கப்பட வேண்டும் என வானதி சீனிவாசன் வலியுறுத்தியுள்ளார். மேலும், முதல் தகவல் அறிக்கையில் (FIR) பெயர் சேர்க்காமல் இருக்க பல கோடி ரூபாய் பேரம் பேசப்பட்டதாகவும் வெளியான தகவல் திடுக்கிட வைப்பதாக அவர் குறிப்பிட்டுள்ளார்.
பாதிக்கப்பட்ட சிறுமிகளின் பாதுகாப்பையும், தனியுரிமையையும் உறுதி செய்ய வேண்டும் என்றும், அவர்கள் அச்சமின்றி சாட்சியமளிக்கத் தேவையான அனைத்து பாதுகாப்புகளையும் தமிழக அரசு வழங்க வேண்டும் என்றும் அவர் கோரியுள்ளார். இந்த விவகாரத்தில் திமுக மற்றும் ஆளுங்கட்சியான தவெக ஆகியவை ஒருவருக்கொருவர் வாதிட்டு காலந்தாழ்த்தாமல், அரசியல் தலையீடோ, அதிகாரம் மற்றும் செல்வாக்கின் அடிப்படையிலான பாரபட்சமோ இன்றி வழக்கு நேர்மையான முறையில் நடைபெற வேண்டும் என்றும் அவர் வலியுறுத்தியுள்ளார்.
தமிழக அரசு இந்த வழக்கில் துரிதமாகவும், வெளிப்படையாகவும் விசாரணையை முன்னெடுக்க வேண்டும் என்றும், அனைத்து உண்மைகளையும் வெளிக்கொணர வேண்டும் என்றும் வானதி சீனிவாசன் கேட்டுக்கொண்டுள்ளார். தவறு செய்தவர்கள் எவ்வளவு பெரிய செல்வாக்கு படைத்தவர்களாக இருந்தாலும் சட்டத்தின் முன் நிறுத்தப்பட வேண்டும் என்பதே தனது வற்புறுத்தல் என்றும் அவர் தனது அறிக்கையில் குறிப்பிட்டுள்ளார்.
