இந்திய கிரிக்கெட்டின் இளம் நம்பிக்கை நட்சத்திரமான 15 வயது வைபவ் சூர்யவன்ஷி, முதன்முறையாக இந்திய டி20 அணியில் இடம்பிடித்து சாதனை படைத்துள்ளார். சர்வதேச கிரிக்கெட் வரலாற்றில் இந்திய ஆண்கள் அணிக்காக அறிமுகமாகும் மிக இளைய வீரர் என்ற பெருமையை பெறும் வாய்ப்பு அவருக்கு கிடைத்துள்ளது.
சமீபத்தில் நடந்து முடிந்த ஐபிஎல் 2026 தொடரில் ராஜஸ்தான் ராயல்ஸ் அணிக்காக துவக்க வீரராக விளையாடிய வைபவ், 16 ஆட்டங்களில் 776 ரன்கள் குவித்து, அதிக ரன்கள் எடுத்த வீரராக முதலிடம் பிடித்தார். அவர் அடித்த 72 சிக்ஸர்கள் புதிய சாதனையாகும். மேலும், ஆரஞ்சு கேப், MVP விருது மற்றும் சிறந்த வளர்ந்து வரும் வீரர் விருதையும் வென்று அனைவரது கவனத்தையும் ஈர்த்தார்.
பீகாரைச் சேர்ந்த இந்த இடதுகை பேட்ஸ்மேன், அயர்லாந்தில் இரண்டு டி20 போட்டிகள் மற்றும் இங்கிலாந்தில் ஐந்து போட்டிகள் கொண்ட டி20 தொடரில் விளையாட உள்ளார். 1989ல் 16 வயது மற்றும் 205 நாட்களில் அறிமுகமான சச்சின் டெண்டுல்கரின் சாதனையை இவர் முறியடிப்பார் என எதிர்பார்க்கப்படுகிறது. ஐபிஎல் தொடருக்கு முன், அண்டர்-19 உலகக் கோப்பையில் தொடர் நாயகன் விருதை வென்று தனது திறமையை ஏற்கனவே நிரூபித்துள்ளார்.
அயர்லாந்து மற்றும் இங்கிலாந்துக்கு எதிரான டி20 தொடருக்கான இந்திய அணி அறிவிக்கப்பட்டுள்ளது. ஸ்ரேயாஸ் ஐயர் தலைமையிலான இந்த அணியில் வைபவ் சூர்யவன்ஷியுடன் அபிஷேக் சர்மா, சஞ்சு சாம்சன், இஷான் கிஷன், சிவம் துபே, திலக் வர்மா, நிதிஷ் குமார் ரெட்டி, அக்ஷர் படேல், வாஷிங்டன் சுந்தர், வருண் சக்ரவர்த்தி, ரவி பிஷ்னோய், ஹர்ஷித் ராணா, அர்ஷ்தீப் சிங் மற்றும் ஜஸ்பிரித் பும்ரா ஆகியோர் இடம்பெற்றுள்ளனர். ஆசிய விளையாட்டுப் போட்டிகளுக்கான 30 பேர் கொண்ட உத்தேச அணியிலும் அவர் சேர்க்கப்பட்டுள்ளார்.
