இந்திய டி20 அணியில் 15 வயது இளம் வீரர் வைபவ் சூர்யவன்ஷியின் அறிமுகம் தாமதமாவது ரசிகர்கள் மத்தியில் பெரும் விவாதத்தை ஏற்படுத்தியுள்ளது. அயர்லாந்துக்கு எதிரான தொடரில் அவர் அறிமுகமாவார் என எதிர்பார்க்கப்பட்ட நிலையில், அது நடக்கவில்லை. இதனால், சூர்யவன்ஷி எப்போது இந்திய அணிக்காக விளையாடுவார் என்ற கேள்வி எழுந்துள்ளது.
பிசிசிஐ வட்டார தகவல்களின்படி, வைபவ் சூர்யவன்ஷியின் அறிமுகம் சாதாரணமானதாக இருக்கக் கூடாது என்றும், அது மிகவும் பிரம்மாண்டமாக அமைய வேண்டும் என்றும் பிசிசிஐ திட்டமிட்டுள்ளதாகக் கூறப்படுகிறது. இதற்காகவே, அவரது அறிமுகத்தை அயர்லாந்து தொடரில் நடத்தாமல் தள்ளிப்போட்டுள்ளதாகத் தெரிகிறது.
அயர்லாந்து தொடரை முடித்துள்ள இந்திய அணி, அடுத்து இங்கிலாந்தில் 5 போட்டிகள் கொண்ட டி20 தொடரில் விளையாட உள்ளது. இந்த போட்டிகள் மான்செஸ்டர், நாட்டிங்ஹாம், சவுத்தாம்ப்டன் போன்ற வரலாற்று சிறப்புமிக்க மைதானங்களில் நடைபெறவுள்ளன. கிரிக்கெட்டின் பிறப்பிடமான இங்கிலாந்தின் புகழ்பெற்ற மைதானங்களில், ஒரு புதிய சகாப்தத்தை உருவாக்கும் வகையில் வைபவ் சூர்யவன்ஷியின் அறிமுகம் அமைய வேண்டும் என பிசிசிஐ அதிகாரிகள் கருதுவதாகத் தகவல் வெளியாகியுள்ளது.
மேலும், இங்கிலாந்துக்கு எதிரான தொடரில் 5 போட்டிகள் இருப்பதால், முதல் இரண்டு போட்டிகளில் இந்திய அணி வெற்றி பெற்றால், எந்தவித அழுத்தமும் இன்றி சூர்யவன்ஷியை அறிமுகப்படுத்தலாம் என்றும் பிசிசிஐ கணக்கு போடுவதாகக் கூறப்படுகிறது. இதனால், கிரிக்கெட்டின் தாயகமான இங்கிலாந்தின் புகழ்பெற்ற மைதானங்களில் ஒன்றில் தான் வைபவ் சூர்யவன்ஷி தனது சர்வதேச கிரிக்கெட் பயணத்தைத் தொடங்குவார் என்பது கிட்டத்தட்ட உறுதியாகியுள்ளது.
