இளம் கிரிக்கெட் வீரர் வைபவ் சூர்யவன்ஷி குறித்து ஊடகங்களில் தொடர்ந்து விவாதிப்பதைத் தவிர்க்க வேண்டும் என்று இந்திய மகளிர் கிரிக்கெட் அணியின் முன்னாள் கேப்டன் அஞ்சும் சோப்ரா வலியுறுத்தியுள்ளார். ஜிம்பாப்வேக்கு எதிரான முதல் டி20 போட்டியில் வெறும் 18 பந்துகளில் அரை சதம் அடித்து வைபவ் சூர்யவன்ஷி வரலாற்றுச் சாதனை படைத்த நிலையில், இதுகுறித்து அஞ்சும் சோப்ரா தனது ஆதங்கத்தை வெளிப்படுத்தியுள்ளார்.
ஜிம்பாப்வேக்கு எதிரான போட்டியில் 19 பந்துகளில் 50 ரன்கள் எடுத்ததன் மூலம், சர்வதேச டி20 போட்டிகளில் மிகக் குறைந்த வயதில் அரை சதம் அடித்த வீரர் என்ற உலக சாதனையை வைபவ் சூர்யவன்ஷி படைத்தார். இருப்பினும், இதற்கு முன்னர் இங்கிலாந்து டி20 தொடரில் சர்வதேச கிரிக்கெட்டில் அறிமுகமானபோது அவர் பெரிய அளவில் ரன் குவிக்கவில்லை என்பது குறிப்பிடத்தக்கது. அப்போது அவரது அறிமுகம் மற்றும் ரன் குவிக்காதது குறித்துப் பலரும் விமர்சித்தனர்.
மைகேல் (Mykhel) தளத்திற்கு அளித்த பேட்டியில் அஞ்சும் சோப்ரா, வைபவ் சூர்யவன்ஷி குறித்துத் தேவையற்ற விவாதங்கள் நடைபெறுவதாகக் குறிப்பிட்டுள்ளார். 'வைபவ் சூர்யவன்ஷி அணிக்குத் தேர்வானாலும் விவாதிக்கிறார்கள், தேர்வாகவில்லை என்றாலும் விவாதிக்கிறார்கள். ரன் அடித்தாலும் பேச்சு, ரன் அடிக்காவிட்டாலும் பேச்சு. ஒரே ஒரு வீரரைப் பற்றி ஏன் இவ்வளவு பேச்சு என்று எனக்குப் புரியவில்லை. இப்போது நாம் ஒன்று வைபவ் சூர்யவன்ஷியைப் பற்றிப் பேசுகிறோம், அல்லது ரோஹித் சர்மாவைப் பற்றிப் பேசுகிறோம். நேரம் இருந்தால் விராட் கோலியைப் பற்றிப் பேசுகிறோம். இது முற்றிலும் தேவையில்லாத ஒன்று' என்று அவர் சாடினார்.
மேலும் பேசிய அஞ்சும் சோப்ரா, இந்திய கிரிக்கெட் அணிக்கு எண்ணற்ற வீரர்கள் வந்து சென்றுள்ளனர். சச்சின் டெண்டுல்கர் கூட தனது கிரிக்கெட் வாழ்க்கையை மிகச் சிறிய வயதில்தான் தொடங்கினார் என்பதை நினைவூட்டினார். வைபவ் சூர்யவன்ஷியிடம் அசாத்திய திறமை உள்ளது என்பது அனைவருக்கும் தெரியும் என்றும், அவர் சதம் அடித்தாலும் அல்லது பூஜ்ஜியத்தில் ஆட்டமிழந்தாலும் அவர் இந்திய அணியின் ஒரு வீரர் மட்டுமே என்றும் அவர் குறிப்பிட்டார்.
'அவரை ஒரு சாதாரண இந்திய வீரராக விளையாட விடுங்கள். எப்போதும் ஒரே வீரரைப் பற்றிப் பேசுவதை நான் விரும்புவதில்லை' என்று அஞ்சும் சோப்ரா தனது கருத்தைத் தெரிவித்தார். ஒரு வீரரின் திறமையை மட்டுமே முன்னிலைப்படுத்தி, அவரைச் சுற்றியுள்ள தேவையற்ற விவாதங்களைத் தவிர்க்க வேண்டும் என்பதே அவரது கோரிக்கையாக உள்ளது.
வைபவ் சூர்யவன்ஷி 18 பந்துகளில் 50 ரன்கள் அடித்த போதிலும், அவர் ஆட்டநாயகன் விருது பெறவில்லை. மாறாக, 2 விக்கெட்டுகளை வீழ்த்திய வீரருக்கு அந்த விருது சென்றது. இதுவும் ஒருபுறம் விவாதப் பொருளாகியுள்ளது.
இந்திய அணி சொந்த மண்ணிலேயே வெளிநாட்டு அணியாக ஆடப் போகும் சூழல் உருவாகியுள்ளது. ஆப்கானிஸ்தான் தொடரில் இந்த புதுமை காணப்படலாம் என்றும் செய்திகள் தெரிவிக்கின்றன. இது இந்திய கிரிக்கெட்டில் ஒரு புதிய அத்தியாயமாக அமையும் என எதிர்பார்க்கப்படுகிறது.
