தமிழ்நாடு அரசுப் பணியாளர் தேர்வாணையம் (TNPSC) நடத்தும் குரூப்-1 முதல்நிலைத் தேர்வுக்கான ஹால் டிக்கெட்டுகள் தற்போது வெளியிடப்பட்டுள்ளன. தேர்வர்கள் தங்களது விண்ணப்ப எண் மற்றும் பிறந்த தேதியை www.tnpscexams.in என்ற இணையதளத்தில் பதிவு செய்து ஹால் டிக்கெட்டை பதிவிறக்கம் செய்துகொள்ளலாம்.
வரும் செப்டம்பர் 27, 2026 அன்று காலை 9.30 மணி முதல் மதியம் 12.30 மணி வரை இந்த முதல்நிலைத் தேர்வு நடைபெறும். இது கொள்குறி வகைத் தேர்வாக (Objective Type) நடத்தப்படுகிறது. இந்த முதல்நிலைத் தேர்வில் வெற்றி பெறுபவர்கள், நான்கு தாள்களைக் கொண்ட விரிந்துரைக்கும் வகை முதன்மைத் தேர்வை எழுத வேண்டும்.
முதன்மைத் தேர்வில் தேர்ச்சி பெறுபவர்களுக்கு இறுதியாக நேர்காணல் நடைபெறும். இவ்வாறு மொத்தம் மூன்று கட்டங்களாக குரூப்-1 தேர்வு நடத்தப்படுகிறது. இந்தத் தேர்வுக்கான அறிவிப்பு கடந்த ஜூன் 23, 2026 அன்று வெளியிடப்பட்டது. தேர்வுக்கு விண்ணப்பிக்க அங்கீகரிக்கப்பட்ட பல்கலைக்கழகத்தில் ஏதேனும் ஒரு பட்டப்படிப்பை முடித்திருக்க வேண்டும் என்பது கல்வித் தகுதியாகும்.
