தமிழகத்தில் இன்று முதல் ஆட்டோ கட்டண உயர்வு அமலுக்கு வந்துள்ளது. முதல் 1.8 கிலோமீட்டர் பயணத்திற்கு இனி ரூ.50 கட்டணம் வசூலிக்கப்படும் என அரசு அறிவித்துள்ளது.
முன்னதாக, தமிழக முதல்வர் விஜய் அக்டோபர் 2-ந் தேதி 'வெற்றிப் பயணம்' என்ற திட்டத்தை தொடங்கி வைத்தார். இதன் மூலம் சாதாரண அரசுப் பேருந்துகளில் பெண்களுக்கு இலவசப் பயணம் என்ற சலுகை, எக்ஸ்பிரஸ், எல்.எஸ்.எஸ்., டீலக்ஸ் உள்ளிட்ட அனைத்து அரசுப் பேருந்துகளுக்கும் விரிவுபடுத்தப்பட்டது. இந்த அறிவிப்பால் ஆட்டோ ஓட்டுநர்களின் வருமானம் பாதிக்கப்படும் என அவர்கள் கடும் எதிர்ப்பு தெரிவித்தனர். பெண்கள் இலவச பேருந்து பயணத்தால் ஆட்டோக்களில் பயணிப்போர் எண்ணிக்கை குறையும் என ஆட்டோ ஓட்டுநர்கள் கவலை தெரிவித்தனர்.
இதற்கிடையில், பெட்ரோல், டீசல் விலை உயர்வு மற்றும் வாகனப் பராமரிப்புச் செலவுகள் அதிகரித்துள்ளதைக் காரணம் காட்டி, ஆட்டோ கட்டணத்தை உயர்த்த வேண்டும் என ஓட்டுநர் சங்கங்கள் தொடர்ந்து தமிழக அரசிடம் கோரிக்கை விடுத்து வந்தன.
இந்தக் கோரிக்கைகளை ஏற்று, ஆட்டோ கட்டணத்தை உயர்த்தி தமிழக அரசு அக்டோபர் 27-ந் தேதி அரசிதழில் அறிவிப்பு வெளியிட்டுள்ளது. இந்த புதிய கட்டண உயர்வு தமிழகம் முழுவதும் இன்று முதல் அமல்படுத்தப்பட்டுள்ளது.
கடந்த 2013-ஆம் ஆண்டு கடைசியாக ஆட்டோ கட்டணம் மாற்றியமைக்கப்பட்டது. அப்போது முதல் 1.8 கிலோமீட்டர் தூரத்திற்கு ரூ.25 கட்டணம் நிர்ணயிக்கப்பட்டது. அதன் பிறகு ஒவ்வொரு கிலோமீட்டருக்கும் ரூ.12 வசூலிக்கப்பட்டது. தற்போது 13 ஆண்டுகளுக்குப் பிறகு, இந்தக் கட்டணம் இரட்டிப்பாக உயர்த்தப்பட்டுள்ளது.
புதிய கட்டண விபரங்களின்படி, முதல் 1.8 கிலோமீட்டர் தூரத்திற்கான கட்டணம் ரூ.25-லிருந்து ரூ.50 ஆக உயர்ந்துள்ளது. இதற்குப் பிறகு ஒவ்வொரு கூடுதல் கிலோமீட்டருக்கும் ரூ.12-க்குப் பதிலாக ரூ.25 வசூலிக்கப்படும். இந்த கட்டண உயர்வு சென்னை மட்டுமின்றி தமிழகம் முழுவதும் உள்ள அனைத்து ஆட்டோக்களுக்கும் பொருந்தும்.
மேலும், இரவு நேரங்களில் ஆட்டோ பயணக் கட்டணமும் உயர்த்தப்பட்டுள்ளது. இரவு 10 மணி முதல் அதிகாலை 5 மணி வரை ஆட்டோவில் பயணம் செய்தால், சாதாரண கட்டணத்தை விட ஒன்றரை மடங்கு கட்டணம் செலுத்த வேண்டும். உதாரணமாக, பகலில் ரூ.50 கட்டணம் வரும் ஒரு பயணத்திற்கு, இரவில் ரூ.75 செலுத்த வேண்டியிருக்கும். ஆட்டோ காத்திருக்கும் நேரத்திற்கும் நிமிடத்திற்கு ரூ.1 கட்டணம் நிர்ணயிக்கப்பட்டுள்ளது.
மலைப்பகுதிகளில் ஆட்டோ பயணக் கட்டணம் சற்று அதிகமாக இருக்கும். அங்கு முதல் 1.8 கிலோமீட்டர் தூரத்திற்கு ரூ.60 கட்டணம் வசூலிக்கப்படும். அதன் பிறகு ஒவ்வொரு கூடுதல் கிலோமீட்டருக்கும் ரூ.30 செலுத்த வேண்டும்.
இதன் மூலம், ஆட்டோ ஓட்டுநர்களின் நீண்ட காலக் கோரிக்கையை முதல்வர் விஜய் தலைமையிலான அரசு நிறைவேற்றியுள்ளது. அதே சமயம், ஆட்டோவை நம்பி அன்றாடம் பயணம் செய்யும் பொதுமக்களுக்கு இனி கூடுதல் செலவு ஏற்படும் என்பது குறிப்பிடத்தக்கது.
