தமிழகத்தில் உள்ள டாஸ்மாக் மதுபான கடைகளில், என்ரிகா நிறுவனத்தின் 11 வகையான மதுபான வகைகளை விற்பனை செய்ய தடை விதிக்கப்பட்டுள்ளது. இந்த திடீர் தடை மதுப்பிரியர்களிடையே பெரும் அதிர்ச்சியை ஏற்படுத்தியுள்ளது.
உணவு பாதுகாப்புத்துறை அதிகாரிகள் டாஸ்மாக் கடைகளில் நடத்திய திடீர் சோதனையின் போது, குறிப்பிட்ட 11 வகை மதுபானங்களில் செயற்கை சுவையூட்டிகள் அதிக அளவில் சேர்க்கப்பட்டது கண்டறியப்பட்டது. இந்திய உணவு பாதுகாப்பு மற்றும் தர நிர்ணய ஆணையத்தின் சோதனையிலும் இது உறுதி செய்யப்பட்டது.
இதனையடுத்து, என்ரிகா நிறுவனத்தின் 11 வகை மதுபானங்களுக்கு மறு உத்தரவு வரும் வரை விற்பனை செய்ய தடை விதித்து டாஸ்மாக் நிர்வாகம் உத்தரவிட்டுள்ளது. குறிப்பாக, 10 பிராந்தி வகைகள் மற்றும் ஒரு ரம் வகை இதில் அடங்கும்.
மேலும், இந்த தடை செய்யப்பட்ட மதுபானங்களின் விற்பனையை உடனடியாக நிறுத்த வேண்டும் என்றும், ஏற்கனவே உள்ள இருப்புகளை நுகர்வோருக்கு விற்பனை செய்யக்கூடாது என்றும் விநியோகஸ்தர்கள், மொத்த விற்பனையாளர்கள் மற்றும் சில்லறை விற்பனையாளர்களுக்கு அறிவுறுத்தல்கள் வழங்கப்பட்டுள்ளன.
என்ரிகா எண்டர்பிரைசஸ் பிரைவேட் லிமிடெட்டின் கீழ் வரும் இந்த 11 வகை மதுபானங்களை கிடங்குகளில் இருந்து சில்லறை விற்பனை கடைகளுக்கு கொண்டு செல்வதையும் உடனடியாக நிறுத்த வேண்டும் என்று உத்தரவிடப்பட்டுள்ளது. FL2 மற்றும் FL3 உரிமம் பெற்றவர்களுக்கு இந்த மதுபானங்களை விற்பனை செய்வதையும் உடனடியாக நிறுத்த வேண்டும் என்றும் டாஸ்மாக் நிர்வாகம் அறிவுறுத்தியுள்ளது.
தடை செய்யப்பட்ட மதுபானங்களின் பட்டியல் பின்வருமாறு:
1. VSOP EXSHAW GOLD BRANDY
2. LOUIS VERNANT XO BLENDED PREMIUM BRANDY
3. Mc Dowells VSOP Brandy (Blended Brandy)
4. NO.1 McDowells Fine Brandy (Indian Brandy)
5. MENSCLUB Deluxe Brandy (Indian Brandy)
6. HONEY BEE FINE Brandy (Indian Brandy)
7. ENRICA VSOP SELECT BRANDY
8. ENRICA PLATINUM RESERVE XO BRANDY
9. ENRICA PREMIUM FRENCH BRANDY
10. VEERAN SPECIAL BRANDY
11. ENRICA OLD INDIE CLASSIC DARK RUM
இந்த தடை உத்தரவு, மதுபானங்களின் தரம் மற்றும் பாதுகாப்பு குறித்த கேள்விகளை எழுப்பியுள்ளது. நுகர்வோரின் ஆரோக்கியத்தை கருத்தில் கொண்டு இந்த நடவடிக்கை எடுக்கப்பட்டுள்ளதாக தெரிகிறது.
