உலகப் புகழ்பெற்ற நெல்லை இருட்டுக்கடை அல்வாவின் விலை கிலோவுக்கு 20 ரூபாய் அதிகரிக்கப்பட்டுள்ளது. இந்த விலை உயர்வு நாளை (ஆகஸ்ட் 27) முதல் அமலுக்கு வருவதாக கடை நிர்வாகம் அறிவித்துள்ளது. திருநெல்வேலி மாவட்டத்தில் உள்ள மற்ற கடைகளிலும் அல்வா, பால் அல்வா, பால்கோவா ஆகியவற்றின் விலைகள் கிலோவுக்கு சுமார் 20 ரூபாய் வரை உயர்த்தப்பட்டுள்ளன. இருப்பினும், விற்பனை வழக்கம் போல் நடைபெற்று வருவதாக கடையின் உரிமையாளர்கள் தெரிவித்துள்ளனர்.
தமிழ்நாட்டின் மற்றொரு முக்கிய இனிப்பு வகையான ஸ்ரீவில்லிபுத்தூர் பால்கோவாவின் விலையும் கணிசமாக உயர்ந்துள்ளது. கிலோ 320 ரூபாய்க்கு விற்பனை செய்யப்பட்டு வந்த பால்கோவா, தற்போது 400 ரூபாயாக விலை உயர்த்தப்பட்டுள்ளது. இதனால் வாடிக்கையாளர்கள் கடும் அதிர்ச்சியடைந்துள்ளனர். சர்க்கரை விலை தொடர்ந்து அதிகரித்து வருவதைக் கட்டுப்படுத்த தமிழ்நாடு முதலமைச்சர் விஜய் உடனடி நடவடிக்கை எடுக்க வேண்டும் என பால்கோவா உற்பத்தியாளர்கள் வலியுறுத்தியுள்ளனர்.
இது குறித்து பால்கோவா உற்பத்தியாளர் திருப்பதிராஜ் கூறுகையில், 'சர்க்கரை விலை உயர்வால் நாங்கள் விலையை உயர்த்த வேண்டிய கட்டாயத்திற்கு தள்ளப்பட்டுள்ளோம். ஸ்ரீவில்லிபுத்தூர் பால்கோவா மிகவும் பிரசித்தி பெற்றது. மதுரை – கொல்லம் தேசிய நெடுஞ்சாலையில் ஸ்ரீவில்லிபுத்தூர் அமைந்துள்ளதால், இந்த வழியாக செல்லும் பயணிகள் மற்றும் கனரக வாகன ஓட்டிகள் என அனைவரும் இங்கு வந்து பால்கோவாவை வாங்கிச் செல்கின்றனர். இதனால் இங்கு செயல்படும் நூற்றுக்கும் மேற்பட்ட பால்கோவா கடைகளில் எப்போதும் விற்பனை அமோகமாக இருக்கும். பால்கோவா தொழிலைப் பாதுகாக்க தமிழ்நாடு முதலமைச்சர் விஜய் உடனடியாக நடவடிக்கை எடுக்க வேண்டும்' என்று அவர் வலியுறுத்தினார்.
இதேபோல், தமிழ்நாட்டின் மற்றொரு பிரபலமான இனிப்பு வகையான கோவில்பட்டி கடலை மிட்டாயின் விலையும் உயர்த்தப்பட்டுள்ளது. வெல்லம், ஏலக்காய், நிலக்கடலை போன்ற மூலப்பொருட்களின் விலை உயர்வால், கோவில்பட்டி கடலை மிட்டாய் விலை கிலோவுக்கு சுமார் 25% அதிகரிக்கப்பட்டுள்ளது. அதன்படி, முன்னர் 220 ரூபாய்க்கு விற்பனை செய்யப்பட்ட ஒரு கிலோ கடலை மிட்டாய், தற்போது 270 ரூபாய்க்கு விற்பனை செய்யப்படுகிறது.
மேலும், பல ஸ்வீட்ஸ் கடைகளில் ஜாங்கிரியின் விலை கிலோவுக்கு 70 ரூபாய் வரையும், ஒரு பீஸ் குலோப் ஜாமூன் 18 ரூபாயிலிருந்து 22 ரூபாயாகவும், அல்வா கிலோவுக்கு 150 ரூபாய் வரையும் உயர்த்தப்பட்டுள்ளது. இந்த விலை உயர்வால் விற்பனை சற்று குறைந்துள்ளதாகவும், அதன் காரணமாக உற்பத்தியும் குறைக்கப்பட்டுள்ளதாகவும் உற்பத்தியாளர்கள் தெரிவித்துள்ளனர்.
இந்த திடீர் விலை உயர்வு இனிப்புப் பிரியர்களிடையே பெரும் அதிர்ச்சியை ஏற்படுத்தியுள்ளது. குறிப்பாக நெல்லை அல்வா, ஸ்ரீவில்லிபுத்தூர் பால்கோவா, கோவில்பட்டி கடலைமிட்டாய் போன்ற பாரம்பரிய இனிப்புகளின் விலை உயர்வு பலரையும் கவலையடையச் செய்துள்ளது. மூலப்பொருட்களின் விலை உயர்வைக் கட்டுப்படுத்தி, இனிப்பு வகைகளின் விலையை சீரமைக்க அரசு நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.
முதலமைச்சர் விஜய் அவர்கள், பால்கோவா உற்பத்தியாளர்களின் கோரிக்கையை ஏற்று, சர்க்கரை விலை உயர்வை கட்டுப்படுத்த உரிய நடவடிக்கை எடுப்பார் என எதிர்பார்க்கப்படுகிறது. இது போன்ற தொடர் விலை உயர்வுகள் நுகர்வோரை மட்டுமின்றி, சிறு மற்றும் குறு உற்பத்தியாளர்களையும் பாதிக்கும் என்பதால், அரசு தலையிட்டு தீர்வு காண வேண்டும் என்பதே அனைவரின் எதிர்பார்ப்பாகும்.
