இந்திய கிரிக்கெட் அணியின் நட்சத்திர வீரரும், டி20 கிரிக்கெட்டில் அதிரடி ஆட்டத்திற்கு பெயர் பெற்றவருமான சூர்யகுமார் யாதவ், சக இளம் வீரர் வைபவ் சூர்யவன்ஷியின் சிக்சர் அடிக்கும் திறமையை தான் திருட விரும்புவதாகக் கூறியுள்ளது கிரிக்கெட் வட்டாரத்தில் பரபரப்பை ஏற்படுத்தியுள்ளது.
மும்பையைச் சேர்ந்த வலதுகை பேட்ஸ்மேனான சூர்யகுமார் யாதவ், டி20 கிரிக்கெட்டில் இதுவரை 9000-க்கும் மேற்பட்ட ரன்களைக் குவித்துள்ளார். இந்திய அணிக்காக டி20 கிரிக்கெட்டில் அதிக ரன்கள் எடுத்த வீரர்கள் பட்டியலில் மூன்றாவது இடத்தில் அவர் உள்ளார். மேலும், இந்திய அணி டி20 உலகக் கோப்பையை வெல்ல முக்கிய காரணமாக இருந்தவர் என்ற பெருமையும் அவருக்கு உண்டு.
இருப்பினும், உலகக் கோப்பை வெற்றிக்குப் பிறகு சூர்யகுமார் யாதவ் கேப்டன் பதவியில் இருந்து நீக்கப்பட்டதோடு, அணியிலிருந்தும் ஓரங்கட்டப்பட்டார். தற்போது மீண்டும் இந்திய அணியில் இடம் பிடிக்க அவர் தீவிரமாகப் போராடி வருகிறார். இந்தச் சூழலில், பிரபல யூடியூப் சேனலான 'ஹியூமன்ஸ் ஆஃப் பாம்பே' நிகழ்ச்சியில் அவர் கலந்துகொண்டார்.
அந்த நிகழ்ச்சியில், இளம் வீரர் வைபவ் சூர்யவன்ஷியின் ஆட்டத்தைப் பாராட்டிய சூர்யகுமார் யாதவிடம், தற்போதைய வீரர்களில் யாருடைய திறமையை நீங்கள் திருட விரும்புவீர்கள்? என்ற கேள்வி கேட்கப்பட்டது. அதற்குப் பதிலளித்த சூர்யகுமார், 'ஒரு இளம் வீரர் இருக்கிறார், அவரது பெயர் வைபவ் சூர்யவன்ஷி. அவரது சிக்சர் அடிக்கும் திறனை நான் நிச்சயம் திருட விரும்புவேன்' என்று கலகலப்பாகக் கூறினார்.
மேலும், தான் எதிர்கொண்டதிலேயே மிகவும் கடினமான பந்துவீச்சாளர் யார் என்ற கேள்விக்கு, இந்திய அணியின் வேகப்பந்து வீச்சாளர் ஜஸ்பிரித் பும்ராவின் பெயரை சூர்யகுமார் யாதவ் குறிப்பிட்டார். 'அவர் எனது அணியில்தான் இருக்கிறார், அவர்தான் பும்ரா' என்று அவர் கூறினார். கொல்கத்தா நைட் ரைடர்ஸ், மும்பை இந்தியன்ஸ் மற்றும் இந்திய அணிகளில் பும்ராவுடன் இணைந்து விளையாடிய அனுபவத்தையும், நெட் பயிற்சியில் அவரை எதிர்கொண்டதையும் சூர்யா நினைவு கூர்ந்தார்.
இறுதியாக, கிரிக்கெட் ஜாம்பவான்களான சச்சின் டெண்டுல்கர் மற்றும் ரோஹித் சர்மா ஆகிய இருவரில் யாரை அதிகம் பிடிக்கும் என்ற கேள்விக்கு, சூர்யகுமார் யாதவ் சுவாரஸ்யமான பதிலளித்தார். 'நான் சச்சின் சாரைப் பார்த்துதான் கிரிக்கெட் விளையாடத் தொடங்கினேன். சிறுவயதில் அவரை தொலைக்காட்சியில் பார்ப்பேன். ஆனால், ரோஹித்துடன் நான் நிறைய கிரிக்கெட் விளையாடியிருக்கிறேன், அவரது தலைமையின் கீழ் விளையாடி இருக்கிறேன். எனவே, இதற்கு எனது பதில் 50-50 தான்' என்று அவர் தெரிவித்தார்.
இந்தக் கருத்துக்கள் மூலம், சக வீரர்களின் திறமைகளைப் பாராட்டுவதோடு, தனது கிரிக்கெட் அனுபவங்களையும் சூர்யகுமார் யாதவ் பகிர்ந்துள்ளார். அவரது இந்தப் பேச்சு, ரசிகர்களிடையே பெரும் வரவேற்பைப் பெற்றுள்ளது.
