தூத்துக்குடியில் ஸ்டெர்லைட் ஆலைக்கு எதிரான போராட்டத்தில் உயிரிழந்த 13 பேரின் குடும்பங்களுக்கு, முதலமைச்சர் விஜய் கூடுதல் நிவாரணத் தொகையை அறிவித்துள்ளார். இது பாதிக்கப்பட்ட குடும்பத்தினரின் நீண்ட நாள் கோரிக்கையை நிறைவேற்றும் விதமாக அமைந்துள்ளது.
கடந்த 2018 ஆம் ஆண்டு மே மாதம் 22 ஆம் தேதி, ஸ்டெர்லைட் ஆலையை நிரந்தரமாக மூடக்கோரி ஆயிரக்கணக்கான பொதுமக்கள் தூத்துக்குடி மாவட்ட ஆட்சியர் அலுவலகத்தை நோக்கி அமைதியான முறையில் பேரணியாக சென்றனர். அப்போது, போராட்டக்காரர்கள் மற்றும் வேடிக்கை பார்த்துக் கொண்டிருந்த மக்கள் மீது காவல்துறையினர் துப்பாக்கிச்சூடு நடத்தினர். இதில் அப்பாவி பொதுமக்கள் 13 பேர் பரிதாபமாக உயிரிழந்தனர், மேலும் 40 பேர் படுகாயமடைந்தனர். இந்த துயரச் சம்பவம் நாடு முழுவதும் பெரும் அதிர்வலைகளை ஏற்படுத்தியது.
இந்த துப்பாக்கிச்சூடு சம்பவம் தொடர்பாக நீதிபதி அருணா ஜெகதீசன் தலைமையிலான ஆணையம் விசாரணை நடத்தியது. இந்த விசாரணையின் அடிப்படையில், பாதிக்கப்பட்ட குடும்பங்களின் கோரிக்கைகளை ஏற்று கூடுதல் நிவாரணம் வழங்க முதலமைச்சர் விஜய் உத்தரவிட்டுள்ளார்.
முதலமைச்சர் வெளியிட்ட செய்திக்குறிப்பின்படி, ஸ்டெர்லைட் போராட்டத்தின் போது உயிரிழந்த 13 நபர்களின் குடும்பங்களுக்கு ஏற்கனவே தலா ரூ.25 லட்சம் நிவாரணமாக வழங்கப்பட்டுள்ளது. மேலும், படுகாயமடைந்த 40 நபர்களுக்கு தலா ரூ.5 லட்சம் வழங்கப்பட்டுள்ளது.
தற்போது, உயிரிழந்த 13 குடும்பங்களுக்கு தலா ரூ.50 லட்சம் வழங்கப்பட வேண்டும் என்ற கோரிக்கையின் அடிப்படையில், ஏற்கனவே வழங்கப்பட்ட ரூ.25 லட்சத்தை தவிர்த்து, மீதமுள்ள தலா ரூ.25 லட்சம் வீதம் மொத்தம் ரூ.3.25 கோடி கூடுதல் நிவாரணமாக வழங்கப்படும்.
அதேபோல், படுகாயமடைந்த 40 நபர்களுக்கு தலா ரூ.10 லட்சம் வழங்கப்பட வேண்டும் என்ற கோரிக்கையின் அடிப்படையில், ஏற்கனவே வழங்கப்பட்ட ரூ.5 லட்சத்தை தவிர்த்து, மீதமுள்ள தலா ரூ.5 லட்சம் வீதம் மொத்தம் ரூ.2 கோடி கூடுதல் நிவாரணமாக வழங்கப்படும்.
ஆக மொத்தம், ஸ்டெர்லைட் போராட்டத்தால் பாதிக்கப்பட்ட குடும்பங்களுக்கு ரூ.5.25 கோடி கூடுதல் நிவாரணத் தொகையை முதலமைச்சர் விஜய் அறிவித்துள்ளார். நீதிபதி அருணா ஜெகதீசன் ஆணையத்தின் பரிந்துரையின்படியே இந்த நிவாரணம் வழங்கப்படுகிறது.
இந்த அறிவிப்பு, ஸ்டெர்லைட் போராட்டத்தின் போது தங்கள் அன்புக்குரியவர்களை இழந்த மற்றும் காயமடைந்த குடும்பங்களுக்கு ஒரு சிறிய ஆறுதலை அளிக்கும் என எதிர்பார்க்கப்படுகிறது. பல ஆண்டுகளாக நீடித்த கோரிக்கை தற்போது நிறைவேற்றப்பட்டுள்ளது.
