சென்னை: இந்திய அணியின் முன்னாள் கேப்டனும், கிரிக்கெட் ஜாம்பவானுமான கிருஷ்ணமாச்சாரி ஸ்ரீகாந்த், சென்னை சூப்பர் கிங்ஸ் (சிஎஸ்கே) அணியின் அடுத்த தலைமைப் பயிற்சியாளர் தேர்வு குறித்து தனது ஆலோசனைகளைத் தெரிவித்துள்ளார். குறிப்பாக, இயான் மோர்கன் மற்றும் பிரண்டன் மெக்கல்லம் ஆகியோரை இந்தப் பொறுப்பில் நியமிக்கக் கூடாது என அவர் திட்டவட்டமாகக் கூறியுள்ளார்.
இயான் மோர்கன், இங்கிலாந்து அணிக்கு ஒருநாள் உலகக் கோப்பையை வென்று கொடுத்திருந்தாலும், அவர் எந்தவொரு அணிக்கும் தலைமைப் பயிற்சியாளராகச் செயல்பட்ட அனுபவம் இல்லாதவர் என்பதை ஸ்ரீகாந்த் சுட்டிக்காட்டினார். இருப்பினும், 2020 மற்றும் 2021 ஐபிஎல் சீசன்களில் கொல்கத்தா நைட் ரைடர்ஸ் அணியின் கேப்டனாகச் செயல்பட்டு, 2021-ல் அந்த அணியை இறுதிப்போட்டி வரை அழைத்துச் சென்றார் என்பது குறிப்பிடத்தக்கது.
மறுபுறம், பிரண்டன் மெக்கல்லம், சமீபத்தில் இங்கிலாந்து டெஸ்ட் அணியின் தலைமைப் பயிற்சியாளர் பொறுப்பில் இருந்து நீக்கப்படுவதற்கு முன்பு வரை, அந்நாட்டு அணியின் அனைத்து விதமான போட்டிகளுக்கும் தலைமைப் பயிற்சியாளராகப் பணியாற்றிய அனுபவம் கொண்டவர்.
சிஎஸ்கே அணியின் அடுத்த தலைமைப் பயிற்சியாளர் தேர்வு குறித்து பேசிய ஸ்ரீகாந்த், 'நான் நிச்சயமாக இயான் மோர்கனைத் தேர்ந்தெடுக்க மாட்டேன். அவர் ஒரு சிறந்த வீரராகவும், இங்கிலாந்து அணிக்கு ஒரு நல்ல கேப்டனாகவும் இருந்தார். ஆனால் ஒரு பயிற்சியாளராக அவரை என்னால் ஏற்றுக்கொள்ள முடியாது. கேகேஆர் அணியின் கேப்டனாக இருந்தபோது கூட அவர் பெரிய அளவில் எதையும் சாதிக்கவில்லை. அவர் வர்ணனையாளராகவே தொடர்வது தான் அவருக்கு நல்லது' என்று திட்டவட்டமாகக் கூறினார்.
மேலும், 'அதேபோல், பிரண்டன் மெக்கல்லத்தையும் தலைமைப் பயிற்சியாளராக நியமிக்காமல் இருப்பது சிஎஸ்கே அணிக்கு நல்லது. மோர்கன் மற்றும் மெக்கல்லம் ஆகிய இருவருக்குமே சிஎஸ்கே நோ சொல்ல வேண்டும்' என்றும் அவர் வலியுறுத்தினார்.
'மிஸ்டர் கிரிக்கெட்' மைக்கேல் ஹசி சிஎஸ்கே அணியுடன் இருக்கும்போது, வெளி ஆட்களைத் தேட வேண்டிய அவசியம் இல்லை என்றும், மைக்கேல் ஹசியே அடுத்த தலைமைப் பயிற்சியாளராகப் பொறுப்பேற்பது மிகச் சிறந்த தேர்வாக இருக்கும் என்றும் ஸ்ரீகாந்த் தனது கருத்தைத் தெரிவித்தார்.
அதே சமயம், வருங்காலத்தில் சிஎஸ்கே அணியில் தோனியின் இடம் என்னவாக இருக்கும் என்பதற்கான ஏற்பாடுகளை முதலில் சரிசெய்ய வேண்டும் என்றும், அதன் பிறகுதான் மற்ற அனைத்தும் சரியாக அமையும் என்றும் ஸ்ரீகாந்த் தனது பேச்சின் முடிவில் கூறினார்.
