2027 ஐபிஎல் தொடர் தொடங்குவதற்கு முன்பாக, சென்னை சூப்பர் கிங்ஸ் அணியின் நட்சத்திர ஆல்-ரவுண்டர் சிவம் துபே, அணியை விட்டு வெளியேற திட்டமிட்டுள்ளதாக தகவல்கள் வெளியாகியுள்ளன. இதுகுறித்து பத்திரிகையாளர் ரோஹித் ஜுக்லான் பகிர்ந்துள்ள தகவல்களின்படி, சிஎஸ்கே அணியில் தன்னை ஒரு முழுமையான ஆல்-ரவுண்டராக சரியாகப் பயன்படுத்தவில்லை என்ற அதிருப்தியில் சிவம் துபே இருப்பதாகக் கூறப்படுகிறது.
கடந்த மூன்று ஐபிஎல் சீசன்களில், ஆல்-ரவுண்டரான சிவம் துபேவுக்கு வெறும் 9 ஓவர்கள் மட்டுமே பந்துவீச வாய்ப்பு வழங்கப்பட்டுள்ளது. இந்த ஓவர்களில் அவர் 2 விக்கெட்டுகளை மட்டுமே வீழ்த்தியுள்ளார். மேலும், இம்பாக்ட் பிளேயர் விதிமுறைகள் காரணமாக அவரது பேட்டிங் வாய்ப்புகளும் குறைந்துள்ளதாகக் கூறப்படுகிறது. குறிப்பாக, 2024 சீசனில் 396 ரன்கள் எடுத்திருந்தாலும், அடுத்தடுத்த சீசன்களான 2025ல் 357 ரன்களும், 2026ல் வெறும் 270 ரன்களுமே அவரால் எடுக்க முடிந்துள்ளது. இதனால், தனது ஆல்-ரவுண்ட் திறமையை முழுமையாக வெளிப்படுத்த ஒரு புதிய அணியைத் தேடி சிஎஸ்கே-விலிருந்து வெளியேற அவர் முடிவு செய்துள்ளதாகத் தகவல் வெளியாகியுள்ளது.
மறுபுறம், சென்னை சூப்பர் கிங்ஸ் அணியில் மிகப்பெரிய மாற்றங்கள் நிகழவிருப்பதாகத் தெரிகிறது. 2024 முதல் 2026 வரையிலான மூன்று சீசன்களாக பிளே-ஆஃப் சுற்றுக்குத் தகுதி பெறத் தவறியதால், புதிய உத்திகளுடன் களமிறங்க நிர்வாகம் திட்டமிட்டுள்ளது. இதன் ஒரு பகுதியாக, வெளிநாட்டு தலைமைப் பயிற்சியாளர் ஒருவரை நியமிப்பது குறித்தும் சிஎஸ்கே நிர்வாகம் ஆலோசித்து வருவதாகக் கூறப்படுகிறது.
முன்னாள் கேப்டன் எம்.எஸ். தோனியின் எதிர்காலமும் இன்னும் தெளிவாகத் தெரியவில்லை. அவர் வீரராகவோ, பயிற்சியாளராகவோ அல்லது அணியில் விளையாடாமலோ கூட இருக்க வாய்ப்புகள் உள்ளதாகத் தெரிகிறது. மேலும், முன்பு போலல்லாமல், தற்போதைய முக்கிய முடிவுகளை தோனியின் ஒப்புதல் இல்லாமலேயே சிஎஸ்கே நிர்வாகம் நேரடியாக எடுக்கத் தொடங்கியுள்ளது.
2010, 2011, 2018, 2021 மற்றும் 2023 ஆகிய ஆண்டுகளில் தோனியின் தலைமையில் 5 முறை கோப்பையை வென்ற சிஎஸ்கே அணி, தற்போது முற்றிலும் புதிய அணியாக மாறி வருவதாகவும் கூறப்படுகிறது. இந்த மாற்றங்களும் சிவம் துபே சிஎஸ்கே அணியை விட்டு விலகும் முடிவை எடுக்க ஒரு காரணமாகக் கருதப்படுகிறது.
எனினும், சிவம் துபே சிஎஸ்கே அணியை விட்டு விலகுவது குறித்து இன்னும் எந்தவிதமான அதிகாரப்பூர்வ அறிவிப்பும் வெளியாகவில்லை. அவர் வேறு அணிக்கு டிரேட் மூலம் செல்வாரா? அல்லது வீரர்களின் ஏலத்தை சந்திப்பாரா? அல்லது கடைசி நிமிடத்தில் சிஎஸ்கே அணியிலேயே தொடர முடிவு செய்வாரா? என்பது வரும் நாட்களில் தெரியவரும் என எதிர்பார்க்கப்படுகிறது.
