தென்னிந்திய சினிமாவின் முன்னணி நடிகையான சமந்தா, தனது நடிப்பில் உருவாகி வரும் 'மா இன்டி பங்காரம்' திரைப்படத்தின் புதிய வெளியீட்டுத் தேதியை அறிவித்துள்ளார். இந்த அறிவிப்பு அவரது ரசிகர்களிடையே பெரும் எதிர்பார்ப்பை ஏற்படுத்தியுள்ளது.
கடந்த ஆண்டு 'சுபம்' திரைப்படத்தில் சிறப்பு தோற்றத்தில் நடித்திருந்த சமந்தா, அது அவரது தயாரிப்பில் வெளியான முதல் படமாகும். தற்போது, அவர் தயாரிப்பதாக அறிவித்த 'மா இன்டி பங்காரம்' திரைப்படம் ரசிகர்கள் மத்தியில் பெரும் ஆர்வத்தை தூண்டியுள்ளது. பி.வி. நந்தினி ரெட்டி இயக்கியுள்ள இந்தப் படத்தில், சமந்தா ஒரு அமைதியான மருமகளாகவும், அதே சமயம் சவால்களை தைரியமாக எதிர்கொள்ளும் அதிரடி பெண்ணாகவும் இரட்டை வேடத்தில் நடித்துள்ளார்.
1980-களின் பின்னணியில், குடும்பம் மற்றும் அதிரடி அம்சங்களை மையமாக வைத்து இப்படம் உருவாக்கப்பட்டுள்ளது. கவுதமி, மஞ்சுஷா, திகந்த் உள்ளிட்டோர் முக்கிய கதாபாத்திரங்களில் நடித்துள்ளனர். சந்தோஷ் நாராயணன் இசையமைத்துள்ளார். ஏற்கெனவே 'ஓ பேபி' திரைப்படத்தின் மூலம் வெற்றி கண்ட சமந்தா – நந்தினி ரெட்டி கூட்டணி மீண்டும் ஒருமுறை இணைந்துள்ளது என்பது குறிப்பிடத்தக்கது.
முதலில் மே 15 அன்று வெளியாகும் என அறிவிக்கப்பட்டிருந்த 'மா இன்டி பங்காரம்' படத்தின் ரிலீஸ் தேதி, தற்போது ஜூன் 19 ஆக மாற்றப்பட்டுள்ளது. சமந்தா தனது சமூக வலைதளப் பக்கத்தில், 'மா இன்டி பங்காரம்' திரைப்படம் ஜூன் 19 அன்று உலகம் முழுவதும் திரையரங்குகளில் வெளியாகும் என அதிகாரப்பூர்வமாக அறிவித்துள்ளார். படத்தின் டீசர் சமீபத்தில் வெளியாகி நல்ல வரவேற்பைப் பெற்றது.
