சித்த புருஷரான சீரடி சாய்பாபா, தான் வாழ்ந்த காலத்திலும், தான் சமாதி அடைந்து 100 ஆண்டுகளைக் கடந்த பிறகும் கூட தனது உண்மையான பக்தர்களின் குறைகளைத் தீர்த்து வருகிறார். அந்த வகையில், தற்போது வெளிநாட்டில் வசிக்கும் ஒரு பக்தரின் வாழ்வில் சாய் பாபா நிகழ்த்திய அற்புதம் குறித்த செய்தி மனதிற்கு ஆறுதல் அளிப்பதாக அமைந்துள்ளது.
இலங்கையில் பிறந்து, தற்போது லண்டன் மாநகரத்தில் வசித்து வரும் ஒரு பெண்மணி, தனது 39 ஆவது வயதில் திருமணம் செய்துகொண்டார். ஆரம்பத்தில் கணவருடன் நல்ல அன்னோன்யம் நிலவினாலும், திருமணம் ஆகி இரண்டு வருடங்களில் இருவருக்கும் இடையே பிரிவு ஏற்பட்டது. இதற்கு காரணம், அந்தப் பெண்மணி 40 வயதைக் கடந்துவிட்டதால் குழந்தை பிறப்பதற்கான வாய்ப்பு இல்லை என அவரது கணவர் கூறியதே ஆகும்.
இதனையடுத்து, தம்பதியினர் இருவரும் முழுமையான மருத்துவ பரிசோதனை மேற்கொண்டனர். அதன் முடிவில், இருவருக்கும் உடல் ரீதியாக எந்தக் குறைபாடும் இல்லை என்றும், தாராளமாக குழந்தை பெற்றுக்கொள்ள முடியும் என்றும் தெரியவந்தது. இருந்தபோதிலும், இதை ஏற்றுக்கொள்ள முடியாத கணவரும் அவரது தாயாரும், அந்தப் பெண்மணியைக் குறை கூறி, கணவருக்கு இரண்டாவதாக திருமணம் செய்து வைப்பதற்கான முயற்சிகளை மேற்கொண்டனர்.
மிகுந்த மன உளைச்சலில் இருந்த அந்தப் பெண்மணி, ஒரு ஆன்மீக இதழில் சீரடி சாய்பாபாவின் மகிமையைப் பற்றிப் படிக்கத் தொடங்கினார். அதில், தீவிர சாய்பாபா உபாசகர் ஒருவர் பக்தர்கள் நலனுக்காக கூட்டுப் பிரார்த்தனை நடத்துவது குறித்த விவரத்தை அறிந்து, அவரைத் தொடர்புகொண்டு தனது மனக்குறையைக் கூறினார்.
அவரது குறையைக் கேட்டு ஆறுதல் கூறிய உபாசகர், அந்தப் பெண்மணிக்காக வாரந்தோறும் வியாழக்கிழமைகளில் நடைபெறும் கூட்டுப் பிரார்த்தனையில், விரைவில் குழந்தை வரம் கிடைப்பதற்காக சாய் பக்தர்களுடன் சேர்ந்து பிரார்த்தனை செய்தார்.
சாய்பாபாவின் பூரண அருளாசியால் நடைபெற்ற இந்தக் கூட்டுப் பிரார்த்தனையின் விளைவாக, தற்போது அந்தப் பெண்மணி கருவுற்றுள்ளார். குழந்தை பிறக்காத மன வருத்தத்தில் இருந்த கணவர் தற்போது மிகுந்த மகிழ்ச்சியுடன், தன்னை அன்புடன் கவனித்துக் கொள்வதாகவும், கணவரின் தாயாரும் மிகுந்த அக்கறையுடன் தேவைகளை நிறைவேற்றித் தருவதாகவும் அவர் தெரிவித்துள்ளார்.
கூடிய விரைவில் இந்தியா வந்து சீரடி சாய்பாபாவை தரிசிக்க ஆவலுடன் காத்திருப்பதாகவும், தனக்காக கூட்டுப் பிரார்த்தனை செய்த சாய் பக்தர்களுக்கும், சாய் பாபாவிற்கும் தான் என்றென்றும் நன்றியுடையவளாக இருப்பதாகவும் அந்தப் பெண்மணி நெகிழ்ச்சியுடன் கூறினார்.
